તમિલનાડુના સિનેમારસિકો માટે એક મોટા અને ખુશીના સમાચાર સામે આવ્યા છે, જ્યાં રાજ્ય સરકારે ‘તમિલનાડુ સિનેમા (રેગ્યુલેશન) રૂલ્સ, 1957’ માં મહત્વપૂર્ણ સુધારો કર્યો છે. આ નવા સંશોધન મુજબ હવે નવી રિલીઝ થતી તમિલ ફિલ્મોના નિર્માતાઓ પ્રથમ સાત દિવસ માટે દિવસ દરમિયાન કુલ છ શો યોજી શકશે. અગાઉ, અગાઉની સરકારે ફિલ્મો માટે પાંચ શોની મંજૂરી આપી હતી અને પાંચમા વિશેષ શો માટે નિર્માતાઓએ દર વખતે સરકારી મંજૂરી લેવી પડતી હતી. હવે આ નવા નિયમથી સવારના 6:00 વાગ્યાથી શરૂ થઈને રાત્રે 2:30 વાગ્યા સુધી સિનેમાઘરો ધમધમતા રહેશે, જેનાથી દર્શકોને મનોરંજન માટે વધુ સમય મળશે.
મુખ્યમંત્રી સી. જોસેફ વિજય દ્વારા લેવાયેલા આ નિર્ણય પાછળ તમિલ ફિલ્મ એક્ટિવ પ્રોડ્યુસર્સ એસોસિએશન, પ્રોડ્યુસર્સ કાઉન્સિલ અને થિયેટર ઓનર્સ એસોસિએશનની રજૂઆતો મુખ્ય કારણ રહી છે. આ અગાઉ વર્ષ 2023માં ડીએમકે સરકારના કાર્યકાળ દરમિયાન કાયદો અને વ્યવસ્થાયી સ્થિતિને ધ્યાનમાં રાખીને વહેલી સવારના શો પર પ્રતિબંધ મૂકવામાં આવ્યો હતો. કલેક્ટર અને પોલીસ તંત્ર દ્વારા સુરક્ષાના કારણોસર આ શો બંધ કરાયા હતા, પરંતુ હવે વર્તમાન સરકાર દ્વારા આ પ્રતિબંધ હટાવી લેવામાં આવ્યો છે અને માત્ર નવું રિલીઝ થયેલું અઠવાડિયું જ નહીં, પરંતુ સ્થાનિક તહેવારો, જાહેર રજાઓ તેમજ શનિવાર અને રવિવારે પણ છ શો યોજવાની છૂટ આપવામાં આવી છે.
સરકારના આ પગલાને ફિલ્મ ઉદ્યોગ દ્વારા આવકારવામાં આવ્યો છે અને પ્રોડ્યુસર્સ એસોસિએશને આભાર વ્યક્ત કર્યો છે. તેમનું માનવું છે કે અન્ય રાજ્યો અને વિદેશોમાં વહેલી સવારે ફિલ્મો રિલીઝ થતી હોવાથી ત્યાંના સમીક્ષકો દ્વારા સોશિયલ મીડિયા પર ફિલ્મો વિશે વહેલી સમીક્ષાઓ આવી જતી હતી, જેના કારણે તમિલનાડુના દર્શકો અસમંજસમાં રહેતા હતા અને સ્થાનિક સ્તરે અસંતુલન ઊભું થતું હતું. હવે આ વૈશ્વિક સ્તરે સમયસર પ્રસારણ થવાથી તમામ જગ્યાએ ફિલ્મો એકસાથે જોવા મળશે અને ઉદ્યોગને પણ મોટો આર્થિક વેગ મળશે. સિનેમાઘરો અને દર્શકો બંનેમાં આ જાહેરાતને લઈને ભારે ઉત્સાહ જોવા મળી રહ્યો છે.
