સુરત ડિસ્ટ્રિક્ટ ક્રિકેટ એસોસિએશનની વાર્ષિક સામાન્ય સભામાં વહીવટી અને નાણાકીય અનિયમિતતાઓને લઈને સત્તાધારી પેનલ અને વિરોધ પક્ષ વચ્ચે જોરદાર ઘર્ષણ સર્જાયું હતું. સભાની શરૂઆતથી જ વિવિધ નિર્ણયો અને વહીવટના મુદ્દે ભારે ગરમાવો જોવા મળ્યો હતો. વિપક્ષી જૂથ દ્વારા ગંભીર આક્ષેપ કરવામાં આવ્યો હતો કે એસોસિએશન દ્વારા અંદાજે રૂપિયા સાત કરોડ જેટલી માતબર રકમના વિકાસ કાર્યો કોઈપણ પ્રકારની ટેન્ડર પ્રક્રિયા હાથ ધર્યા વિના જ બારોબાર કરાવી દેવાયા છે. આ ઉપરાંત મનસ્વી રીતે કોન્ટ્રાક્ટની મુદત લંબાવવાના મુદ્દે પણ તીખા સવાલો પૂછવામાં આવ્યા હતા, જેને પગલે સંબંધિત કમિટીના ચેરમેન પાસેથી તાત્કાલિક રાજીનામાની ઉગ્ર માંગ કરવામાં આવી હતી.
સભા દરમિયાન આક્ષેપ-પ્રતિઆક્ષેપોનું વાતાવરણ એટલી હદે વણસ્યું હતું કે પ્રમુખના પુત્રો અને સભ્ય રોહન દેસાઈ વચ્ચે ઉગ્ર બોલાચાલી બાદ મારામારી જેવી અપ્રિય પરિસ્થિતિ નિર્માણ પામી હતી. આ ઘટનાને પગલે સભાગૃહમાં ભારે તણાવ ફેલાઈ ગયો હતો. આ સાથે જ સંસ્થાના પ્રમુખ છેલ્લા બે વર્ષથી સતત ગેરહાજર રહેતા હોવાનો મુદ્દો પણ સભ્યો દ્વારા જોરશોરથી ઉઠાવવામાં આવ્યો હતો. વિપક્ષે આક્ષેપ કર્યો હતો કે સત્તાધારી પક્ષમાં આંતરિક ફૂટ પડી ચૂકી છે અને પોતાના માનીતાઓને નિયમો નેવે મૂકીને માનદ સભ્યપદ તેમજ વિવિધ હોદ્દાઓની લ્હાણી કરવામાં આવી રહી છે, જેથી તમામ માનદ સભ્યોની યાદી જાહેર થવી જોઈએ.
સંસ્થામાં પારદર્શિતા લાવવા માટે વિપક્ષ દ્વારા સુરત ડિસ્ટ્રિક્ટ ક્રિકેટ એસોસિએશનને તાત્કાલિક અસરથી સાર્વજનિક ટ્રસ્ટ ધારા હેઠળ નોંધણી કરાવવાની બંધારણીય માંગણી કરવામાં આવી હતી. આ ઉપરાંત વાર્ષિક અહેવાલમાંથી કેટલાક મહત્વના હોદ્દેદારોના નામ ગાયબ હોવા અંગે પણ સભ્યોએ ભારે નારાજગી વ્યક્ત કરી વિરોધ નોંધાવ્યો હતો. નાણાકીય ભ્રષ્ટાચાર, વહીવટી અંધાધૂંધી અને સત્તાના દુરુપયોગના આક્ષેપો વચ્ચે સંપન્ન થયેલી આ વાર્ષિક સભાને પગલે સ્થાનિક રમત જગતમાં ભારે ચકચાર મચી જવા પામી છે.
