દિલ્હીમાં જૂના સંસદ ભવનના સેન્ટ્રલ હોલની તર્જ પર તૈયાર કરવામાં આવેલી વિશેષ બેઠક વ્યવસ્થા વચ્ચે ઈન્ડિયા ગઠબંધન દ્વારા મુખ્ય ચૂંટણી કમિશનર જ્ઞાનેશ કુમાર વિરુદ્ધ પ્રતીકાત્મક 'જાહેર મહાભિયોગ'નું આયોજન કરવામાં આવ્યું હતું. લોકસભાના પૂર્વ સ્પીકર મીરા કુમારની અધ્યક્ષતામાં યોજાયેલી આ મોક પાર્લામેન્ટમાં કોંગ્રેસ અધ્યક્ષ મલ્લિકાર્જુન ખડગે દ્વારા મહાભિયોગનો પ્રસ્તાવ રજૂ કરવામાં આવ્યો હતો. આ બેઠકમાં ગઠબંધનના દિગ્ગજ નેતાઓ ઉપરાંત વિવિધ રાજ્યોના મુખ્યમંત્રીઓ અને જે નાગરિકોના નામ મતદાર યાદીમાંથી કમી કરવામાં આવ્યા છે તેમણે પણ ભાગ લઈને પોતાની વેદના વ્યક્ત કરી હતી. વિપક્ષી નેતાઓએ આખી કાર્યવાહીનું લાઈવ પ્રસારણ પણ કર્યું હતું.
પ્રસ્તાવ રજૂ કરતા મલ્લિકાર્જુન ખડગેએ ચૂંટણી પંચ પર ગંભીર આક્ષેપો મૂકતા જણાવ્યું હતું કે શાસક પક્ષના ઈશારે ૧૩.૨ કરોડ મતદારોના નામ ગેરકાયદેસર રીતે હટાવવામાં આવ્યા છે અને ચૂંટણી પ્રક્રિયા સાથે ચેડાં કરવામાં આવ્યા છે. ખડગેએ મુખ્ય ચૂંટણી કમિશનર પર લોકશાહીની હત્યા કરવાનો આરોપ લગાવતા તેમને તાત્કાલિક પદ પરથી હટાવવા અને તેમની સામે દેશદ્રોહનો કેસ ચલાવવાની માંગ કરી હતી. અધ્યક્ષસ્થાનથી બોલતા મીરા કુમારે પણ આખી પ્રક્રિયા પર ચિંતા વ્યક્ત કરી હતી કે ભારતની મજબૂત લોકશાહી પર આજે ગંભીર જોખમ તોળાઈ રહ્યું છે અને વિશ્વના અનેક દેશો આપણી ચૂંટણી પદ્ધતિનું અનુકરણ કરે છે ત્યારે આવા સવાલો ઊભા થવા દુઃખદ છે.
બીજી બાજુ, સત્તાધારી ભારતીય જનતા પાર્ટીએ આ મોક પાર્લામેન્ટ સામે આકરા પ્રહાર કરતા તેને માત્ર એક અર્થહીન તમાશો ગણાવ્યો હતો. ભાજપના પ્રવક્તાએ વિપક્ષી નેતા રાહુલ ગાંધી પર કટાક્ષ કરતા કહ્યું કે ચૂંટણીમાં જીતી ન શકવાના કારણે તેઓ હવે પોતાની મરજીનું કાલ્પનિક સંસદ ભવન ચલાવીને જનતામાં ભ્રમ ફેલાવવાનો પ્રયાસ કરી રહ્યા છે. અગાઉ, કેન્દ્રીય ગૃહમંત્રી અમિત શાહે પણ વિપક્ષને સંસદના વિશેષ સત્રમાં આવીને આ મુદ્દે ખુલ્લી ચર્ચા કરવા માટે પડકાર ફેંક્યો હતો, પરંતુ વિપક્ષી દળો સંસદમાં ચર્ચા કરવાને બદલે આવા સ્ટંટ કરી રહ્યા હોવાનો આક્ષેપ ભાજપ દ્વારા કરવામાં આવ્યો છે.
