વડાપ્રધાન નરેન્દ્ર મોદીએ ગુજરાતના એકતાનગર ખાતે પરેડ ગ્રાઉન્ડ પર સરદાર વલ્લભભાઈ પટેલની ૧૫૧મી જન્મજયંતિ નિમિત્તે ઉજવાતા રાષ્ટ્રીય એકતા દિવસના અવસરે વિશાળ જનમેદનીને સંબોધિત કરી હતી. આ પ્રસંગે તેમણે દેશના રાજકારણ અને આંતરિક સુરક્ષાના મુદ્દે ગંભીર ચિંતા વ્યક્ત કરી હતી. વિપક્ષ પર આકરા પ્રહાર કરતા તેમણે જણાવ્યું હતું કે, દેશનું દુર્ભાગ્ય છે કે આજે વિપક્ષ માત્ર 'વિરોધ પક્ષ' બનીને રહેવાને બદલે દેશના વિકાસમાં રૂકાવટ બનતો 'અવરોધ પક્ષ' બની ગયો છે. વડાપ્રધાને સ્પષ્ટ શબ્દોમાં કહ્યું હતું કે, આજના સંવેદનશીલ સમયમાં દેશના નાગરિકોએ તમામ પ્રકારની વિભાજનકારી તાકાતો સામે મજબૂત એકતા દર્શાવવી અનિવાર્ય છે.
કોંગ્રેસ નેતા રાહુલ ગાંધીની વિદેશ યાત્રાઓ પર પરોક્ષ નિશાન સાધતા વડાપ્રધાને સવાલો ઉઠાવ્યા હતા કે વિદેશી ધરતી પર ગુપ્ત બેઠકો કોણ યોજી રહ્યું છે અને ભારત વિરોધી તાકાતો કોને સમર્થન આપી રહી છે? તેમણે આક્ષેપ કર્યો હતો કે દેશના દુશ્મનોની ભાષા બોલનારા લોકો સોશિયલ મીડિયાનો હથિયાર તરીકે ઉપયોગ કરીને અફવાઓ ફેલાવી રહ્યા છે અને વૈશ્વિક સ્તરે ભારતની છબી ખરડાવવાના પ્રયાસો થઈ રહ્યા છે. નક્સલવાદ અને માઓવાદના ખાતમા અંગે વાત કરતા તેમણે ગર્વપૂર્વક જણાવ્યું કે ગત વર્ષે આપેલો વાયદો પૂરો કરીને દેશને નક્સલમુક્ત બનાવવામાં આવ્યો છે. જોકે, તેમણે ચેતવણી આપી હતી કે ભૌતિક નક્સલવાદનો નાશ થયા બાદ પણ દેશમાં 'દિમાગી નક્સલો'નો ખતરો હજુ પણ ખૂબ મોટો પડકાર બનીને ઊભો છે.
પોતાના સંબોધનના અંતમાં વડાપ્રધાને દેશના ભવિષ્યના લક્ષ્યોની રૂપરેખા સ્પષ્ટ કરી હતી. તેમણે કહ્યું કે ભારત સરકાર આગામી સમયમાં સરહદોને સંપૂર્ણ સુરક્ષિત કરવા, ઘૂસણખોરી અને વસ્તી વિષયક ફેરફારોને રોકવા તેમજ બિનસાંપ્રદાયિક સિવિલ કોડ તરફ આગળ વધવા માટે કટિબદ્ધ છે. 'એક ભારત શ્રેષ્ઠ ભારત' અને 'વિકસિત ભારત' એ આપણા બે મુખ્ય ધ્યેયો છે, તેમ જણાવીને તેમણે લોખંડી પુરુષ સરદાર પટેલના માર્ગે આગળ વધીને દેશને નવી ઊંચાઈઓ પર લઈ જવા માટે સૌને એક થઈને કામ કરવા માટે પ્રેરિત કર્યા હતા.
