આમ આદમી પાર્ટી (AAP) દ્વારા શનિવારે સત્તાવાર રીતે આગામી વર્ષ ૨૦૨૭માં યોજાનારી પંજાબ વિધાનસભા ચૂંટણી માટેના ઉમેદવારોની પ્રથમ યાદી જાહેર કરવામાં આવી છે. પાર્ટીના રાષ્ટ્રીય સચિવ પંકજ કુમાર ગુપ્તા દ્વારા જારી કરવામાં આવેલી આ યાદીમાં કુલ ૪૦ ઉમેદવારોના નામની જાહેરાત કરવામાં આવી છે, જેમાં પંજાબના મુખ્યમંત્રી ભગવંત માન ફરી એકવાર ધુરી વિધાનસભા બેઠક પરથી ચૂંટણી લડશે. આ યાદીમાં માલવા, મઝા અને દોઆબા એમ ત્રણેય ક્ષેત્રોના મહત્ત્વપૂર્ણ મતવિસ્તારોને આવરી લેવામાં આવ્યા છે, જે દર્શાવે છે કે પાર્ટીએ ચૂંટણી રણનીતિની વહેલી શરૂઆત કરી દીધી છે.
આ જાહેર કરાયેલી યાદીમાં મુખ્યમંત્રી ભગવંત માન ઉપરાંત વિધાનસભાના સ્પીકર કુલતાર સિંહ સંધવાણને કોટકપૂરાથી અને મંત્રી સંજીવ અરોરાને લુધિયાણા પશ્ચિમમાંથી ટિકિટ આપવામાં આવી છે. આ ઉપરાંત, પ્રમુખ ઉમેદવારોમાં અમૃતસર દક્ષિણથી ડૉ. ઇન્દરબીર સિંહ નિજ્જર, એસ.એ.એસ. નગરથી કુલવંત સિંહ, હોશિયારપુરથી બ્રહ્મ શંકર શર્મા જિંપા, બટાલાથી અમાન શેર સિંહ (શેરી કલસી), અજનાલાથી કુલદીપ સિંહ ધાલીવાલ અને તરણતારણથી હરમીત સિંહ સંધુનો સમાવેશ થાય છે. લુધિયાણા પૂર્વથી દલજીત સિંહ ગ્રેવાલ ભોલા અને લુધિયાણા મધ્યથી અશોક પરાશર પાપ્પીને પણ પાર્ટીએ પોતાના ઉમેદવાર બનાવ્યા છે.
આમ આદમી પાર્ટીએ આ વહેલી ઉમેદવારી જાહેરાત દ્વારા પંજાબમાં પોતાની સત્તા જાળવી રાખવા માટે અત્યારથી જ મજબૂત કવાયત શરૂ કરી દીધી છે. વર્ષ ૨૦૨૭ની ચૂંટણીને ધ્યાનમાં રાખીને પક્ષ દ્વારા લેવાયેલું આ પગલું વિપક્ષો સામે વહેલી માનસિક સરસાઈ મેળવવાની રણનીતિનો એક ભાગ માનવામાં આવી રહ્યો છે. જોકે, લુધિયાણા પશ્ચિમથી ઉમેદવાર જાહેર કરાયેલા સંજીવ અરોરા હાલ જેલમાં હોવા છતાં પાર્ટીએ તેમના પર વિશ્વાસ વ્યક્ત કર્યો છે, જે રાજકીય વર્તુળોમાં ચર્ચાનો વિષય બન્યો છે. આ યાદી સાથે 'આપ' પંજાબના રાજકારણમાં ફરી એકવાર જીત મેળવવા માટે પૂરી તાકાત સાથે મેદાનમાં ઉતરી ચૂકી છે.
