અમદાવાદ શહેર પોલીસ દળની ગરિમા અને ખાખી વર્દીને કલંકિત કરતી એક અત્યંત ચોંકાવનારી ઘટના પ્રકાશમાં આવી છે. નરોડા પોલીસ મથકમાં દુષ્કર્મના ગંભીર ગુના હેઠળ ઝડપાયેલો કાચા કામનો કેદી રાધે ઉર્ફે ગોપાલ ઠક્કર અસારવા સિવિલ હોસ્પિટલમાં સારવાર હેઠળ હતો. હોસ્પિટલમાંથી તેને રજા મળ્યા બાદ નિયમ મુજબ પૂરતા પોલીસ જાપ્તા સાથે સાબરમતી સેન્ટ્રલ જેલ ખાતે મોકલવાનો હતો. પરંતુ, હેડક્વાર્ટર ખાતે ફરજ બજાવતા ASI રાજેશ દયારામ આ આરોપીના નજીકના સંબંધી હોવાથી તેમણે તમામ નિયમોને નેવે મૂકી દીધા હતા. ASI એ પૂરતો પોલીસ જાપ્તો રાખ્યા વગર જ એકાંતમાં આરોપીનો કબજો મેળવી લીધો હતો અને સિવિલ હોસ્પિટલથી સીધા જેલ જવાના બદલે તેને પોતાની સાથે પૂર્વ વિસ્તારમાં આવેલા વસ્ત્રાલ નિરાંત ચાર રસ્તા ખાતે લઈ ગયા હતા, જ્યાં પૂર્વ આયોજિત કાવતરા મુજબ આરોપી પોલીસ પકડમાંથી નાસી છૂટવામાં સફળ રહ્યો હતો.
આરોપી વસ્ત્રાલથી ભાગી છૂટ્યા બાદ પોતાના બચાવ માટે ASI રાજેશ દયારામે એક ખોટી કહાની ઘડી કાઢી હતી અને પોલીસ કંટ્રોલ રૂમમાં ગેરમાર્ગે દોરતી વર્દી લખાવી હતી. તેમણે દાવો કર્યો હતો કે સિવિલ હોસ્પિટલથી નીકળ્યા બાદ દૂધેશ્વર સર્કલ પાસે ટ્રાફિકની ભીડનો લાભ લઈને આરોપી તેમને ચકમો આપીને ફરાર થઈ ગયો છે. આ ખોટા મેસેજના પગલે માધવપુરા પોલીસ સ્ટેશનનો કાફલો તાત્કાલિક દોડતો થઈ ગયો હતો અને તપાસ શરૂ કરી હતી. જોકે, પોલીસે જ્યારે દૂધેશ્વર વિસ્તારના સીસીટીવી ફૂટેજ, લોકેશન અને ટેક્નિકલ સર્વેલન્સની આકરી તપાસ કરી ત્યારે કોઈ જ શંકાસ્પદ હિલચાલ નજરે પડી ન હતી. ઊંડાણપૂર્વકની તપાસમાં સમગ્ર ભાંડો ફૂટી ગયો હતો અને સાચી હકીકત બહાર આવી હતી કે આરોપી દૂધેશ્વરથી નહીં પરંતુ વસ્ત્રાલથી ભાગ્યો છે.
ખાખીની છબીને ખરડનારા આ ગંભીર કૃત્યને અમદાવાદ પોલીસ કમિશનરેટ દ્વારા અત્યંત ગંભીરતાથી લેવામાં આવ્યું છે. આ સમગ્ર પ્રકરણમાં વિભાગીય લાપરવાહી અને ગુનાહિત સંડોવણી સાબિત થતાં આર્મ્ડ યુનિટના પોલીસ ઇન્સ્પેક્ટર દ્વારા રામોલ પોલીસ સ્ટેશનમાં કાયદેસરની સત્તાવાર ફરિયાદ દાખલ કરવામાં આવી છે. રામોલ પોલીસે કસ્ટડીમાંથી ફોસલાવી કે બળજબરી વગર જાણી જોઈને નાસી છૂટનારા દુષ્કર્મના આરોપી રાધે ઉર્ફે ગોપાલ ઠક્કર તેમજ પોતાના જ સંબંધીને ભગાડવામાં મુખ્ય મદદગારી કરી કંટ્રોલ રૂમમાં ખોટી માહિતી આપનારા ભ્રષ્ટ ASI રાજેશ દયારામ વિરુદ્ધ ગુનો નોંધીને કડક કાનૂની કાર્યવાહીના ચક્રો ગતિમાન કર્યા છે.
