વિશ્વના અગ્રણી ટેક અબજોપતિ એલોન મસ્કે તાજેતરમાં જ તેમના ૧૪ સંતાનો સાથેના સહ-પાલન (કો-પેરેન્ટિંગ) અને સમય વિતાવવાના ચોક્કસ શેડ્યુલ અંગે ખુલાસો કર્યો છે. સોશિયલ મીડિયા પર એવા દાવાઓ કરવામાં આવ્યા હતા કે મસ્ક પોતાના પિતૃત્વની જવાબદારીઓ કોઈ બિઝનેસ કંપનીની જેમ કેલેન્ડર ઇન્વાઇટ્સ અને સ્ટાફના માધ્યમથી મેનેજ કરે છે. આ અહેવાલો મુજબ, મસ્કના બાળકો તેમની માતાઓ અનુસાર અલગ-અલગ જૂથમાં રહે છે અને તેમના અડધા ભાઈ-બહેનો વચ્ચે ખાસ કોઈસંપર્ક નથી હોતો. આ દાવાઓ સામે આવતા જ સોશિયલ મીડિયા પર ભારે ચર્ચા જાગી હતી કે શું ખરેખર કુટુંબ જીવન પણ કોર્પોરેટ સંચાલન જેવું હોઈ શકે છે?
આ તમામ અટકળો અને દાવાઓનો સખત પ્રતિસાદ આપતા એલોન મસ્કે સ્પષ્ટતા કરી છે કે સોશિયલ મીડિયા પર ફેલાવવામાં આવેલી માહિતી અનેક સ્તરે ખોટી અને ભ્રામક છે. તેમણે જણાવ્યું કે તેમના મોટા પાંચ સંતાનો હવે પુખ્ત વયના છે અને તેઓ પોતાની સ્વતંત્ર જિંદગી જીવી રહ્યા છે. મસ્કે પોતાના વાસ્તવિક શેડ્યુલ વિશે જણાવતા કહ્યું હતું કે તેઓ ક્લેર (ગ્રીમ્સ) સાથેના સંતાનોને દર અઠવાડિયે વૈકલ્પિક ધોરણે મળે છે, જ્યારે શિવોન ઝિલીસ સાથેના બાળકોને દર થોડા દિવસે નિયમિતપણે મળે છે. તેમણે સ્પષ્ટ કર્યું હતું કે તેમનું આ પિતૃત્વ વ્યવસ્થાપન કોઈ કોર્પોરેટ કંપની જેવું નહીં, પરંતુ સંપૂર્ણપણે અંગત અને લાગણીસભર છે.
નોંધનીય છે કે એલોન મસ્કના ચાર અલગ-અલગ મહિલાઓ સાથે કુલ ૧૪ જાહેર થયેલા સંતાનો છે. જેમાં તેમની પ્રથમ પત્ની જસ્ટિન વિલ્સન, સંગીતકાર ક્લેર બાઉચર (ગ્રીમ્સ), ન્યુરલિંક એક્ઝિક્યુટિવ શિવોન ઝિલીસ અને એશ્લે સેન્ટ ક્લેરનો સમાવેશ થાય છે. મસ્કના પરિવારમાં જોડિયા અને તિડિયા બાળકોનો પણ સમાવેશ થાય છે, અને તેમના કેટલાક બાળકોના અસામાન્ય નામો અગાઉ પણ ભારે ચર્ચાનો વિષય બન્યા હતા. આ ખુલાસા દ્વારા મસ્કે એ વાત પર ભાર મૂક્યો છે કે વ્યસ્ત વેપારી જીવન હોવા છતાં તેઓ પિતા તરીકેની પોતાની જવાબદારીઓ સુપેરે સમજે છે અને બાળકો સાથે પૂરતો સમય વિતાવે છે.
