ગુજરાતમાં હવામાન વિભાગની આગાહી કે અચાનક પલટા વચ્ચે રાજ્યના અનેક પંથકોમાં માવઠાએ ભારે હાહાકાર મચાવ્યો છે. સૌરાષ્ટ્રથી લઈને ઉત્તર ગુજરાત સુધીના અનેક જિલ્લાઓમાં વરસાદી માહોલ જામ્યો છે. રાજકોટના ધોરાજી પંથકમાં સાંજ પડતાંની સાથે જ ધોધમાર વરસાદ વરસી પડ્યો હતો, તો જૂનાગઢના કેશોદ ગ્રામ્ય વિસ્તારો જેવા કે મોવાણા, પીપળી અને કેવદ્રામાં પણ વરસાદી ઝાપટાં પડ્યા હતા. પોરબંદરના બરડા પંથક અને રાણાવાવના બિલેશ્વર સહિતના ગામોમાં ભારે બફારા બાદ વરસાદ ખાબકતા વાતાવરણમાં અચાનક ઠંડક પ્રસરી ગઈ હતી, પરંતુ આ બદલાયેલા માહોલે સામાન્ય જનજીવનને પણ પ્રભાવિત કર્યું છે.
સૌરાષ્ટ્રના ગીર સોમનાથ પંથકમાં માવઠાનું સ્વરૂપ વધુ આક્રમક જોવા મળ્યું હતું. કોડીનારના ઘાંટવડ ગામે ભારે પવન અને ગાજવીજ સાથે પડેલા વરસાદને કારણે ભારે નુકસાન થયું છે. અહીં વાડી વિસ્તારમાં આવેલાં ખેડૂતોનાં મકાનોનાં છાપરાં ઉડી ગયા હતા અને એક પેટ્રોલ પંપને પણ વ્યાપક નુકસાન પહોંચ્યું હતું. આ ઉપરાંત સાબરકાંઠાના વડાલી શહેર અને રહેડા તેમજ અમરેલી જિલ્લાના ખાંભા ગીરના ડેડાણ અને ચકરાવા જેવા ગ્રામ્ય વિસ્તારોમાં પણ કમોસમી વરસાદે એન્ટ્રી કરી હતી. ઠેર-ઠેર થયેલા આ અનિચ્છનીય વરસાદી માહોલને કારણે ગ્રામ્ય વિસ્તારોમાં ભારે દોડધામ મચી ગઈ હતી અને લોકોએ સાવચેતીનાં પગલાં લેવા મજબૂર બનવું પડ્યું હતું.
આ કમોસમી વરસાદ અને માવઠાને કારણે સૌથી મોટો ફટકો રાજ્યના અન્નદાતા એટલે કે ખેડૂતોને પડ્યો છે. હાલમાં ખેતરોમાં કપાસ, મગફળી, સોયાબીન અને વિવિધ શાકભાજીનો પાક સંપૂર્ણપણે તૈયાર થઈને લણણી (કાપણી) માટે તૈયાર ઊભો હતો. બરાબર પાક ઘરભેગો કરવાની ટાણે જ વરસાદનું વિઘ્ન નડતા ખેડૂતોની મહિનાઓની મહેનત પાણીમાં જતી દેખાઈ રહી છે. પાક પલળી જવાને કારણે તેની ગુણવત્તા બગડશે અને બજારમાં યોગ્ય ભાવ નહીં મળે તેવી ચિંતાથી ખેડૂતોમાં ભારે નિરાશા અને ચિંતાનું મોજું ફરી વળ્યું છે. વહેલી તકે સરકારી તંત્ર દ્વારા સર્વે કરીને નુકસાનનું વળતર આપવામાં આવે તેવી ખેડૂતોમાં પ્રબળ માંગ ઉઠી રહી છે.
