જામનગર શહેરમાં તાજેતરમાં બનેલી ફૂડ પોઈઝનિંગની અપ્રિય ઘટનાને જિલ્લા વહીવટી તંત્ર અને મનપાએ અત્યંત ગંભીરતાથી લીધી છે. સામાન્ય જાનમાલ અને નાગરિકોના સ્વાસ્થ્ય સુરક્ષાને સર્વોપરી ગણીને ફૂડ વિભાગની વિશેષ ટીમો દ્વારા શહેરભરમાં ચેકિંગ અભિયાન શરૂ કરવામાં આવ્યું છે. આ સ્પેશિયલ ડ્રાઈવ અંતર્ગત બીજા દિવસે પણ અધિકારીઓ દ્વારા નોન-વેજ આઉટલેટ્સ પર અણધારી મુલાકાતો લેવામાં આવી હતી, જેના કારણે ખાણીપીણીના વેપારીઓમાં ભારે દોડધામ મચી ગઈ હતી અને સમગ્ર શહેરમાં આ કાર્યવાહી ચર્ચાનો વિષય બની રહી છે.
આ ડ્રાઈવ દરમિયાન ફૂડ શાખાની વિવિધ ટીમોએ શહેરના અલગ-અલગ વિસ્તારોમાં ધમધમતી નોન-વેજ રેસ્ટોરન્ટો, હોટેલો, કેટરર્સ તેમજ ફાસ્ટ ફૂડ અને નોન-વેજની લારીઓ પર સઘન ઓચિંતી તપાસ હાથ ધરી હતી. તપાસણી ટૂકડી દ્વારા વેપારીઓ દ્વારા ગ્રાહકોને પીરસવામાં આવતા ખાદ્ય પદાર્થોની ગુણવત્તા, તેમની ફ્રેશનેસ તેમજ રસોડા અને આસપાસના પરિસરમાં જાળવવામાં આવતી સ્વચ્છતાની ઝીણવટભરી ચકાસણી કરવામાં આવી હતી. ખોરાક બનાવવામાં વાપરવામાં આવતી સામગ્રી માનવ સ્વાસ્થ્ય માટે હાનિકારક તો નથી ને, તેની વિશેષ ખાતરી કરવામાં આવી હતી.
ફૂડ વિભાગની આ આક્રમક અને અચાનક હાથ ધરેલી કાર્યવાહીને પગલે શહેરમાં નોન-વેજ અને ફાસ્ટ ફૂડનું વેચાણ કરતા વેપારીઓમાં ભારે ફફડાટ ફેલાઈ ગયો છે. તંત્ર દ્વારા તમામ વેપારીઓને સ્પષ્ટ અને કડક શબ્દોમાં તાકીદ કરવામાં આવી છે કે તેઓ ગ્રાહકોને માત્ર ગુણવત્તાયુક્ત, તાજો અને સ્વાસ્થ્યપ્રદ ખોરાક જ પીરસે અને વ્યવસાયિક સ્થળોએ ઉત્તમ સ્વચ્છતા જાળવે. જો ભવિષ્યમાં કોઈપણ વેપારી દ્વારા નિયમોનું ઉલ્લંઘન કરવામાં આવશે, તો તેમની સામે કોઈ પણ પ્રકારની ૨આશિકી વગર સખત કાનૂની અને દંડકીય પગલાં લેવામાં આવશે તેવી કડક ચેતવણી પણ ઉચ્ચારવામાં આવી છે.
