મણિપુરમાં આગામી વર્ષની શરૂઆતમાં યોજાનારી વિધાનસભા ચૂંટણી અગાઉ રાજકીય ગરમાવો જોવા મળી રહ્યો છે, ત્યારે રાજ્યના પૂર્વ મુખ્યમંત્રી અને વરિષ્ઠ ભાજપ નેતા એન. બિરેન સિંહે એક વિશેષ મુલાકાતમાં મોટો ખુલાસો કર્યો છે. તેમણે જણાવ્યું છે કે ભાજપ સરકારે જનતાનો ખોવાયેલો વિશ્વાસ અને ભરોસો પાછો મેળવવા માટે તાકીદે નક્કર પગલાં લેવા પડશે. સિંહે આક્ષેપ કર્યો હતો કે તેમના જ પક્ષના કેટલાક નેતાઓએ કોંગ્રેસ સાથે મળીને તેમને પદભ્રષ્ટ કરવા માટેનું મોટું રાજકીય કાવતરું રચ્યું હતું, જેના કારણે તેમણે ફેબ્રુઆરી ૨૦૨૫માં રાજીનામું આપવું પડ્યું હતું. તેમણે સ્પષ્ટપણે કહ્યું કે પક્ષના કેટલાક ધારાસભ્યો તેમને બે વખત મુખ્યમંત્રી બનવા બદલ સ્વીકારી શક્યા ન હતા અને ભાજપને પોતાની અંગત મિલકત માનતા હતા.
પોતાના હટવાથી રાજ્યમાં શાંતિ સ્થપાવાના તર્કને ફગાવતા બિરેન સિંહે વર્તમાન વાય કેખેમચંદ સિંહ સરકારના સમયમાં પણ ચાલુ રહેલી હિંસા અને નાગા-કુકી સમુદાયો વચ્ચેના સંઘર્ષ પર ગંભીર સવાલો ઉઠાવ્યા છે. તેમણે પ્રશ્ન કર્યો કે તેમની વિદાય છતાં હિંસા કેમ અટકી નથી અને નિર્દોષોના ભોગ કેમ લેવાઈ રહ્યા છે? પૂર્વ મુખ્યમંત્રીએ ચિંતા વ્યક્ત કરી હતી કે ગેરકાયદેસર વસાહતીઓ સામેની ઝુંબેશ, પૉ્પીની ખેતી વિરોધી અભિયાન અને બાયોમેટ્રિક ઓળખ જેવા મહત્વના મુદ્દાઓ પર વર્તમાન સરકાર દ્વારા કોઈ દેખીતી કાર્યવાહી ન થવાને કારણે જનતામાં અસંતોષ ફેલાઈ રહ્યો છે અને ભાજપ પબ્લિક સપોર્ટ ગુમાવી રહ્યો છે. જો સમયસર આ બાબતોની જનતામાં યોગ્ય માહિતી આપવામાં નહીં આવે તો ચૂંટણીમાં પક્ષને મોટું નુકસાન વેઠવું પડી શકે છે.
આ તમામ આંતરિક મતભેદો અને વર્તમાન સરકારની કાર્યશૈલી સામે અસંતોષ વ્યક્ત કરવા છતાં, એન. બિરેન સિંહે મણિપુરના ભવિષ્ય માટે ભાજપનું સત્તામાં પરત ફરવું એકમાત્ર વિકલ્પ હોવાનું જણાવ્યું છે. તેમણે આશા વ્યક્ત કરી છે કે ભાજપનું કેન્દ્રીય નેતૃત્વ આ પરિસ્થિતિમાં હસ્તક્ષેપ કરશે અને મતદારો સુધી પહોંચીને સરકારી યોજનાઓ તેમજ સુરક્ષાત્મક પગલાંઓનો પ્રચાર કરશે. પૂર્વ મુખ્યમંત્રીએ પોતાની વિરુદ્ધ થયેલા રાજકીય ષડયંત્ર અને આંતરિક ખેંચતાણને કારણે પોતાના અધૂરા રહેલા વિકાસ કાર્યો અંગે દુઃખ વ્યક્ત કર્યું હતું, સાથે જ જનતા તરફથી ફરી મુખ્યમંત્રી બનવા માટે ભારે માંગ હોવાનો દાવો પણ કર્યો હતો.
