વડાપ્રધાન નરેન્દ્ર મોદીની આવતીકાલની કેવડિયા મુલાકાતને લઈને એકતાનગરમાં ઉત્સાહનો માહોલ જોવા મળી રહ્યો છે. રાષ્ટ્રીય એકતા દિવસની ઉજવણીના ભાગરૂપે તેઓ વિશ્વની સૌથી ઊંચી પ્રતિમા એવી ‘સ્ટેચ્યુ ઑફ યુનિટી’ ખાતે લોહપુરુષ સરદાર વલ્લભભાઈ પટેલને ભાવભીની શ્રદ્ધાંજલિ અર્પણ કરશે. આ રાષ્ટ્રીય પર્વની ઉજવણીને વધુ યાદગાર બનાવવા માટે પ્રવાસીઓ અને સ્થાનિક નાગરિકો માટે અંદાજે રૂ. 426.71 કરોડના વિશાળ માળખાકીય અને પ્રવાસન પ્રોજેક્ટ્સની ભેટ ધરવામાં આવશે, જેનાથી કેવડિયાનો વૈશ્વિક પ્રવાસન નકશા પર દબદબો વધુ મજબૂત બનશે.
આ ભવ્ય વિકાસયત્રા અંતર્ગત રૂ. 307.83 કરોડના ખર્ચે તૈયાર થયેલા કુલ 23 જેટલા વિવિધ પ્રોજેક્ટ્સનું લોકાર્પણ કરવામાં આવશે. જેમાં પ્રવાસીઓને આકર્ષવા માટે રૂ. 50 કરોડના ખર્ચે અત્યાધુનિક IRCTC હોટલ, રૂ. 16 કરોડના ખર્ચે નવી એકતા ક્રૂઝ, રેઇન ફોરેસ્ટ અને ઇકો-ટ્રેઇલ જેવા આકર્ષણો ખુલ્લા મુકાશે. આ ઉપરાંત, પ્રવાસીઓની સગવડ માટે ટ્રાવેલેટર્સ, સુવેજ તથા વોટર ટ્રીટમેન્ટ પ્લાન્ટ, કોલોની રોડ, સ્ટાફ ક્વાર્ટર્સ, આકર્ષક ફુવારાઓ, ગ્લો ગાર્ડનનું અપગ્રેડેશન અને પર્યાવરણને અનુકૂળ ઇલેક્ટ્રિક બસો જેવી અનેકવિધ સવલતો પ્રવાસીઓના અનુભવને અદ્ભુત બનાવશે.
માત્ર લોકાર્પણ જ નહીં, પરંતુ ભવિષ્યના વિકાસને વેગ આપવા માટે વડાપ્રધાનના હસ્તે રૂ. 118.88 કરોડના ખર્ચે થનારા અન્ય 8 વિકાસકાર્યોનું ખાતમુહૂર્ત પણ યોજાશે. આ નવા પ્રોજેક્ટ્સમાં ગોરા-ભાણદ્રા રોડ, ખલવાણી બ્રિજ, કેક્ટસ અને બટરફ્લાય ગાર્ડનનો એકીકૃત વિકાસ તેમજ વાઘડિયા રોડનું વિસ્તરણ મુખ્ય છે. સાથે જ, ડેમની સુરક્ષા માટે ડિઝાસ્ટર કંટ્રોલ રૂમ અને રૂ. 36.58 કરોડના ખર્ચે આધુનિક સ્માર્ટ ઝીરો વેસ્ટ ઇન્ટિગ્રેટેડ સોલિડ વેસ્ટ મેનેજમેન્ટ પ્રોજેક્ટ જેવા મહત્વપૂર્ણ કાર્યોથી એકતાનગર સ્વચ્છતા અને સુરક્ષાના ક્ષેત્રે પણ એક નવો રાહ ચીંધશે.
