અરવલ્લી જિલ્લાના વહીવટી તંત્રમાંથી એક અત્યંત મહત્વના અને ચોંકાવનારા સમાચાર સામે આવ્યા છે. જિલ્લામાં વિકાસલક્ષી યોજનાઓનું યોગ્ય આયોજન અને સમયસર અમલીકરણ કરવાની મુખ્ય જવાબદારી જે અધિકારીના શિરે છે, તે જ જિલ્લા આયોજન અધિકારી શશાંક પાંડેની કામગીરી હવે ગંભીર શંકાના ઘેરામાં આવી ગઈ છે. સરકાર દ્વારા પ્રજાકલ્યાણ અને વિકાસ માટે ફાળવવામાં આવતી વિવેકાધીન ગ્રાન્ટનો સમયસર ઉપયોગ થવાને બદલે તે લાંબા સમયથી વણવપરાયેલી હાલતમાં પડી રહી હતી, જેને વહીવટી તંત્રએ અત્યંત ગંભીરતાથી લીધી છે.
પરિસ્થિતિની ગંભીરતાને ધ્યાનમાં લઈને અરવલ્લી જિલ્લા કલેક્ટર મિલિન્દ બાપનાએ આ મામલે સખ્ત વલણ અપનાવ્યું છે અને જિલ્લા આયોજન અધિકારી શશાંક પાંડે સામે તકેદારી તપાસના આદેશો જારી કર્યા છે. પ્રાથમિક તપાસમાં વહીવટી સ્તરે સ્પષ્ટપણે બેદરકારી અને નિયમોની ક્ષતિઓ સામે આવતા આ કડક પગલું ભરવામાં આવ્યું છે. આ ઉચ્ચ સ્તરીય તપાસના આદેશથી સમગ્ર જિલ્લા વહીવટી વર્તુળોમાં દોડધામ મચી ગઈ છે અને અન્ય અધિકારીઓમાં પણ ફફડાટ ફેલાઈ ગયો છે.
આગામી સમયમાં હાથ ધરનાર આ તકેદારી તપાસ દરમિયાન વિવિધ યોજનાઓ હેઠળ ફાળવાયેલી ગ્રાન્ટનો સમયસર ઉપયોગ કેમ ન થયો, તેની પાછળના વાસ્તવિક કારણો અને સમગ્ર નાણાકીય વ્યવહારની ઝીણવટભરી ચકાસણી કરવામાં આવશે. તપાસનો સત્તાવાર અહેવાલ આવ્યા બાદ કસૂરવાર જણાતા કોઈપણ જવાબદાર અધિકારી સામે કાયદેસરની અને કડક શિસ્તભંગની કાર્યવાહી કરવામાં આવશે તેવી પૂરી સંભાવના છે, જેણે ભ્રષ્ટ અને બેદરકાર અધિકારીઓની ઊંઘ હરામ કરી દીધી છે.
