અમેરિકી સેન્ટ્રલ બેંક એટલે કે ફેડરલ રિઝર્વે તાજેતરની બેઠક બાદ પોતાના કી રેટને 3.9 ટકા પર અચળ રાખવાનો મોટો નિર્ણય લીધો છે. મોંઘવારી હજુ પણ ઊંચી સપાટી પર જળવાઈ હોવા છતાં બેંકે હાલ પૂરતો વ્યાજદર નથી વધાર્યો, જેથી આગામી પગલાં ભરવા માટે પૂરતો ડેટા અને માહિતી એકત્ર કરી શકાય. ફેડરલ રિઝર્વે ગયા મહિને જ ત્રણ વર્ષમાં પહેલીવાર વ્યાજદરમાં 0.25 ટકાનો વધારો કર્યો હતો. ચેરમેન કેવિન વોર્શે સ્પષ્ટ શબ્દોમાં જણાવ્યું છે કે આર્થિક નીતિઓ હવે અસર બતાવી રહી છે અને બેંકનું મુખ્ય લક્ષ્ય મોંઘવારીને કાબૂમાં લાવીને તેને 2 ટકાના નિર્ધારિત ટાર્ગેટ સુધી પહોંચાડવાનું છે.
આ બેઠક એવા સમયે યોજાઈ છે જ્યારે મોંઘવારી અને વધતા જીવનર્ચને કારણે સામાન્ય નાગરિકો મુશ્કેલીમાં છે અને ગેસ, કરિયાણા તેમજ કપડાં જેવી વસ્તુઓ મોંઘી થઈ છે. આમ છતાં, કેવિન વોર્શે રાજકીય દબાણની વાતને નકારી કાઢતા કહ્યું કે આ નિર્ણયમાં રાજકારણની કોઈ ભૂમિકા નથી અને બેઠક દરમિયાન રાજકારણ પર કોઈ ચર્ચા થઈ નથી. હાલમાં ઊર્જાના ભાવ અને આર્ટિફિશિયલ ઇન્ટેલિજન્સ ટેકનોલોજી માટે વધી રહેલું ઇન્ફ્રાસ્ટ્રક્ચર પણ મોંઘવારી વધારી રહ્યા છે. મોટા ટેક ફોર્મ્સ ડેટા સેન્ટર્સ બનાવવા માટે લોન પર નિર્ભર છે ત્યારે ઊંચા વ્યાજદર આ રોકાણને ઠંડુ કરવામાં મદદ કરશે. વૉલ સ્ટ્રીટના ઇકોનોમિસ્ટ્સ અને એનાલિસ્ટ્સનું માનવું છે કે આગામી 8 થી 9 ડિસેમ્બરે યોજાનારી આગામી બેઠકમાં ફેડરલ રિઝર્વ વ્યાજદરમાં ફરીથી 0.25 ટકાનો વધારો કરી શકે છે, કારણ કે મોંઘવારી સામેની લડાઈ હજુ પૂરી થઈ નથી.
આ બેઠકમાં બે અધિકારીઓએ વ્યાજદર યથાવત રાખવાના વિરોધમાં વોટ આપ્યો હતો અને રેટ વધારવાની તરફેણ કરી હતી, જે દર્શાવે છે કે સેન્ટ્રલ બેંકમાં હજુ પણ રેટ વધારાને લઈને સમર્થન છે. યુએસ ઇકોનોમી હાલ મજબૂત ગતિથી આગળ વધી રહી છે અને બેરોજગારીનો દર 4.2 ટકા પર નીચો છે, જ્યારે જુલાઈથી સપ્ટેમ્બર ક્વાર્ટરમાં આર્થિક વિકાસ દર વધીને 3 ટકાથી વધુ રહેવાનો અંદાજ છે. મોર્ગેજ રેટ વધીને 7.4 ટકાની ઊંચાઈએ પહોંચવાને કારણે લાખો અમેરિકનો માટે ઘર ખરીદવું મોંઘું બન્યું છે. ફેડરલ રિઝર્વના આ કડક વલણથી ભવિષ્યમાં લોન, ઓટો લોન અને ક્રેડિટ કાર્ડનો વપરાશ મોંઘો થશે, પરંતુ લાંબā ગાળે તે મોંઘવારીને ડામવામાં ચોક્કસ કારગર સાબિત થશે.
