ઇઝરાયેલમાં મંગળવારે યોજાયેલી ચૂંટણીના પરિણામો અને ટ્રેન્ડ્સમાં મોટો રાજકીય ઉલટફેર જોવા મળી રહ્યો છે. દેશના ૨૧ ટકા જેટલા અરબ નાગરિકોએ વડાપ્રધાન બેન્જામિન નેતન્યાહૂની સરકારની કથિત જાતિવાદી નીતિઓ સામે રોષ વ્યક્ત કરીને ભારે મતદાન કર્યું છે. આ જબરદસ્ત ટર્નઆઉટના કારણે ઇઝરાયેલની સંસદ એટલે કે નેસેટમાં અરબ પાર્ટીઓ ઇતિહાસ રચવા જઈ રહી છે અને તેઓ રાજકારણની આગામી દિશા નક્કી કરવામાં મુખ્ય ભૂમિકા ભજવી શકે છે.
વોટ ટેલી મુજબ, ઇઝરાયેલની સંસદની કુલ 120 સીટોમાંથી બે મુખ્ય અરબ પાર્ટીઓ આશરે 19 સીટો જીતી રહી છે, જે તેમની વર્તમાન સંખ્યા કરતા લગભગ બે ગણી છે. બેન્જામિન નેતન્યાહૂનું ગઠબંધન બ્લોક 53 સીટો પર આગળ છે, જે બહુમત માટે જરૂરી 61 સીટો કરતા ઘણું પાછળ છે, જ્યારે ગાડી આઈસેનકોટનું વિપક્ષી જૂથ 48 સીટો જીતે તેવી શક્યતા છે. અરબ નેતા યુસેફ જબારીને સ્પષ્ટ કર્યું છે કે તેમની પાર્ટી નેતન્યાહૂની સરકારને હટાવવા માટે કામ કરશે, જોકે ગાડી આઈસેનકોટના ગાઝા યુદ્ધ અભિયાનના સમર્થનને કારણે તેઓ ડાયરેક્ટ સરકારમાં જોડાવવાને બદલે બહારથી સમર્થન આપવા અંગે વિચારી શકે છે.
અરબ પાર્ટી રાઆમના વડા મનસૂર અબ્બાસે આઈસેનકોટના નેતૃત્વવાળી સરકાર સાથે જોડાવવાની ઈચ્છા દર્શાવી છે, પરંતુ બીજી તરફ આઈસેનકોટના બ્લોકે પ્રચાર દરમિયાન અરબ પાર્ટીઓ સાથે સરકાર બનાવવાનો ઇનકાર કર્યો હતો. રાજકીય નિષ્ણાતોના મતે આ એક મોટો વિરોધાભાસ છે કે યહૂદી વિપક્ષને સત્તામાં આવવા માટે પેલેસ્ટિનિયન વોટોની જરૂર છે, છતાં તેઓ તેમને સાચા ભાગીદાર તરીકે સ્વીકારવા તૈયાર નથી. અસલી મુદો અરબ સમુદાયના હકો, ભેદભાવનો અંત અને સમાનતાનો છે, ત્યારે આગામી દિવસોમાં ઇઝરાયેલનું રાજકારણ કઈ દિશામાં વળાંક લે છે તે રસપ્રદ રહેશે.
