પંચમહાલ જિલ્લાની LCB ટીમ જ્યારે હાલોલ ગ્રામ્ય પોલીસ મથક વિસ્તારમાં પેટ્રોલિંગ કરી રહી હતી, ત્યારે તેમને બાતમી મળી હતી કે અભેટવા ગામના નારાયણ નગરમાં રહેતો મનોજ શાંતિલાલ પરમાર પોતાના ઘરમાં જ વિદેશી દારૂનો જથ્થો છુપાવીને વેપલો ચલાવી રહ્યો છે. આ પાકી બાતમીના આધારે પોલીસ ટીમ દ્વારા તાત્કાલિક અસરથી ઉપરોક્ત મકાન પર દરોડો પાડવામાં આવ્યો હતો. પોલીસ પહોંચી ત્યારે મકાનનું બારણું ખુલ્લું હતું અને અંદર તપાસ કરતા કોઈ શખ્સ હાજર મળી આવ્યો ન હતો.
ઘરની અંદર બારીકાઈથી તપાસ હાથ ધરતા પોલીસ પણ ચોંકી ઉઠી હતી, કારણ કે પલંગની નીચે તેમજ અલગ-અલગ થેલાઓમાંથી વિદેશી દારૂ અને બિયરના ટીનનો મોટો જથ્થો મળી આવ્યો હતો. પોલીસે આ તમામ ગેરકાયદેસર માલસામાન કબજે કરીને કુલ 3,53,921 રૂપિયાની કિંમતનો મુદ્દામાલ જપ્ત કર્યો છે. આ કેસમાં દારૂનો ધંધો કરનાર મનોજ શાંતિલાલ પરમાર પોલીસની રેડ વખતે ફરાર થઈ ગયો હોવાથી તેને વોન્ટેડ જાહેર કરવામાં આવ્યો છે.
આ મામલે હાલોલ ગ્રામ્ય પોલીસ મથકે આરોપી વિરુદ્ધ ગુનો નોંધીને કાયદેસરની કાર્યવાહી શરૂ કરવામાં આવી છે. પોલીસ હવે એ તપાસ કરી રહી છે કે આટલી મોટી માત્રામાં દારૂનો જથ્થો ક્યાંથી લાવવામાં આવ્યો હતો અને આ ધંધામાં તેની સાથે બીજા કોણ-કોણ સંડોવાયેલા છે. બુટલેગરો સામે પોલીસની આ લાલ આંખથી સ્થાનિક વિસ્તારમાં પણ ચર્ચાનો વિષય બન્યો છે.
