રાજકોટના રૈયાધાર વિસ્તારમાં મચ્છોનગર ટાઉનશીપમાં રહેતો અને મેળામાં બાળકોની રાઈડ ફેરવીને પોતાનું પેટિયું રડતો 22 વર્ષીય લાલુસિંગ ભૈરવસિંગ ચૌહાણ નામનો યુવક બાબરા પાલિકા દ્વારા આયોજિત સ્વદેશી મેળામાં પોતાની રાઈડો લઈને ધંધા અર્થે ગયો હતો. રાત્રે અંદાજે 10 વાગ્યાના અરસામાં મેળામાં એક અજાણી વ્યક્તિ આવીને બાળકોની ટ્રેનમાં કોઈને બેસાડીને ટ્રેન ઝડપથી ચાલુ કરવાનું કહ્યું હતું. સંચાલક યુવકે નિયમ મુજબ પહેલા ટિકિટ લેવાનું કહેતા જ પેલો શખસ ભારે ઉશ્કેરાઈ ગયો હતો અને યુવકને ગડદાપાટુનો માર મારવા લાગ્યો હતો. થોડીવાર બાદ તે શખસ અન્ય એક વ્યક્તિ સાથે હાથમાં ધોકો લઈને પાછો આવ્યો હતો અને યુવકને ગાળો ભાંડતા-ભાંડતા આડેધડ ધોકાથી માર મારીને મેળામાં જ ઢસડ્યો હતો, જેને કારણે ત્યાં હાજર લોકોમાં પણ ડરનો માહોલ ફેલાઈ ગયો હતો.
આ બનાવની પ્રાપ્ત વિગતો મુજબ હુમલાખોરોની દાદાગીરી એટલી હદે વધી ગઈ હતી કે તેમણે નિર્દોષ યુવકને બેરહેમીથી માર માર્યો હતો, જોકે સમયસર આસપાસના લોકો વચ્ચે બચાવવા માટે દોડી આવ્યા ન હોત તો સ્થિતિ વધુ ગંભીર બની શકી હોત. આ મારામારીની ઘટનાનો એક વિડિયો પણ સામે આવ્યો છે, જેમાં સ્પષ્ટપણે જોઈ શકાય છે કે કેવી રીતે આવારા તત્વો દ્વારા સંચાલક યુવકને ઢસડીને બેફામ માર મારવામાં આવી રહ્યો છે. આ હુમલામાં યુવકને ગંભીર મૂંઢ ઇજાઓ પહોંચતા તેને તાત્કાલિક સારવાર માટે રાજકોટ સિવિલ હોસ્પિટલ ખાતે દાખલ કરવામાં આવ્યો હતો, જ્યાં તેની સારવાર ચાલી રહી છે.
હોસ્પિટલ ચોકીના સ્ટાફ દ્વારા આ મામલે બાબરા પોલીસ સ્ટેશનને સત્તાવાર રીતે જાણ કરવામાં આવી છે. પોલીસે વાયરલ થયેલા વિડિયો અને યુવકની ફરિયાદના આધારે અજાણ્યા શખ્સો સામે ગુનો નોંધીને તેમની ધરપકડ કરવાની અને કાયદેસરની કડક કાર્યવાહી હાથ ધરવાની તજવીજ શરૂ કરી દીધી છે. મેળા જેવા જાહેર સ્થળો પર આવા અસામાજિક તત્વો દ્વારા ખુલ્લેઆમ ચાલતી દાદાગીરી સામે નાગરિકોમાં રોષ ભભૂકી ઉઠ્યો છે અને પોલીસ દ્વારા આ મામલે સત્વરે સખત પગલાં લેવામાં આવે તેવી લોકમાગ ઉઠી છે.
