આગામી 29 ઓક્ટોબરે દેશભરમાં કરવા ચોથના તહેવારની ઉજવણી થવાની છે, ત્યારે સામાન્ય જનતાના મનમાં સવાલ હોય છે કે શું આ દિવસે બેંકો બંધ રહેશે? તો આપને જણાવી દઈએ કે આ દિવસે દેશભરમાં કોઈ સાર્વત્રિક બેંક હોલિડે નથી. રિઝર્વ બેંક ઓફ ઈન્ડિયા (RBI) ના હોલિડે કેલેન્ડર મુજબ, હિમાચલ પ્રદેશના શિમલામાં જ કરવા ચોથ નિમિત્તે બેંક બ્રાન્ચો બંધ રહેવાની છે. જ્યારે દિલ્હી, મુંબઈ, બેંગલુરુ સહિત દેશના બાકીના મોટાભાગના શહેરોમાં બેંકો રાબેતા મુજબ ખુલ્લી રહેશે અને તમામ સરકારી તેમજ ખાનગી બેંકોમાં નિયમિત કામકાજ ચાલુ રહેશે.
આ હોલિડે શેડ્યૂલ સ્ટેટ બેંક ઓફ ઈન્ડિયા (SBI), HDFC બેંક, ICICI બેંક, એક્સિસ બેંક, પંજાબ નેશનલ બેંક (PNB), કેનેડા બેંક અને બેંક ઓફ બરોડા જેવી તમામ મુખ્ય બેંકોની સ્થાનિક શાખાઓને લાગુ પડે છે. જો કે, દિલ્હી, મુંબઈ કે બેંગલુરુ જેવા શહેરોના ગ્રાહકોએ પણ કોઈ પણ અગવડથી બચવા માટે પોતાની લોકલ બ્રાન્ચની સ્થિતિ અગાઉથી ચકાસી લેવી વધુ હિતાવહ રહેશે. આ ઉપરાંત, મહિનાના બીજા અને ચોથા શનિવાર તથા રવિવારના નિયમિત સપ્તાહિક અવકાશ તો યથાવત જ રહે છે.
જો કોઈ કારણસર સ્થાનિક સ્તરે બેંક બ્રાન્ચ બંધ પણ રહે, તો પણ ગ્રાહકો માટે ડિજિટલ બેંકિંગ સેવાઓ 24 કલાક ચાલુ જ રહેવાની છે. મોબાઈલ બેંકિંગ, ઈન્ટરનેટ બેંકિંગ અને UPI દ્વારા ફંડ ટ્રાન્સફર તેમજ બલેન્સ ચેક કરવાનું કામ સરળતાથી થઈ શકશે. આ સાથે જ કેશ વિડ્રોલ માટે ATM પણ ખુલ્લા રહેશે, જો કે ફિઝિકલ બ્રાન્ચમાં જઈને કરવા પડતા કામો કે ચેક ક્લિયરન્સમાં વિલંબ થઈ શકે છે. તેથી કેશ ડિપોઝિટ કે ડોક્યુમેન્ટ સબમિટ જેવા જરૂરી કામો હોય તો ગ્રાહકોએ બેંકની સત્તાવાર વેબસાઈટ પર જઈને હોલિડે લિસ્ટ ચોક્કસ જોઈ લેવું જોઈએ.
