દિવાળીના તહેવારોમાં અચાનક આગ કે અકસ્માતના બનાવો ન બને અને સામાન્ય જનતાને કોઈ અગવડ ન પડે તે માટે જામનગરમાં વહીવટી તંત્ર દ્વારા કમર કસવામાં આવી છે. અધિક જિલ્લા મેજિસ્ટ્રેટ દ્વારા જામનગર શહેર અને સમગ્ર જિલ્લામાં ફટાકડાના ખરીદ-વેચાણ તેમજ તેના ઉપયોગને લઈને એક મહત્વપૂર્ણ જાહેરનામું બહાર પાડવામાં આવ્યું છે. આ નવા નિયમો પાછળનો મુખ્ય હેતુ હાનિકારક પ્રદૂષણ અને અકસ્માતો અટકાવવાનો છે, જેથી લોકો સુરક્ષિત રીતે પોતાના તહેવારોની ઉજવણી કરી શકે.
જાહેરનામાની વિગતો મુજબ, જામનગર જિલ્લામાં હવેથી કોઈપણ વ્યક્તિ કે નાગરિક રાત્રે 8.00 થી 10.00 કલાક દરમિયાન જ ફટાકડા ફોડી શકશે. આ ઉપરાંત મોટા પ્રમાણમાં વાયુ અને અવાજનું પ્રદૂષણ ફેલાવતી તેમજ કચરો કરતી સિરીઝવાળા ફટાકડાના વેચાણ અને ઉપયોગ પર સંપૂર્ણ પ્રતિબંધ રહેશે. બજારમાં માત્ર પેસો સંસ્થા દ્વારા અધિકૃત અને માન્ય ધ્વનિ સ્તરવાળા ગ્રીન ફટાકડા જ વેચી શકાશે, જેના બોક્સ પર યોગ્ય માર્કિંગ હોવું અનિવાર્ય છે. હોસ્પિટલ, શૈક્ષણિક સંસ્થાઓ, કોર્ટ અને ધાર્મિક સ્થળોની 100 મીટરની ત્રિજ્યાના વિસ્તારને સાયલન્ટ ઝોન જાહેર કરવામાં આવ્યો છે, જ્યાં ફટાકડા ફોડવા પર કડક મનાઈ છે. સાથે જ કોઈપણ વિદેશી ફટાકડા કે ચાઈનીઝ તુક્કલ એટલે કે સ્કાય લેન્ટર્નનું વેચાણ કે ઉપયોગ નહીં થઈ શકે અને ફ્લિપકાર્ટ કે એમેઝોન જેવી કોઈ પણ ઈ-કોમર્સ વેબસાઈટ ઓનલાઈન ઓર્ડર સ્વીકારી શકશે નહીં.
આ નિયમોનું ચુસ્તપણે પાલન કરાવવા માટે માત્ર લાયસન્સ ધારક વેપારીઓને જ સુપ્રીમ કોર્ટના આદેશ મુજબના માન્ય ફટાકડા વેચવાની મંજૂરી આપવામાં આવી છે, જેમાં બેરિયમના ઉપયોગ પર પ્રતિબંધ છે. પેટ્રોલપંપ, એલપીજી ગોડાઉન કે અન્ય જ્વલનશીલ પદાર્થોની આસપાસ તેમજ જાહેર રસ્તાઓ પર ફટાકડા ફોડવા પર પણ રોક લગાવવામાં આવી છે. તંત્ર દ્વારા જારી કરાયેલ આ કડક જાહેરનામું આગામી 24-11-2026 સુધી સમગ્ર જામનગર જિલ્લામાં અમલમાં રહેશે અને જો કોઈ આ નિયમોનું ઉલ્લંઘન કરશે તો તેની સામે કાયદેસરની કાર્યવાહી કરવામાં આવશે.
