દેવભૂમિ દ્વારકામાં ગોંડલીયા પરિવાર દ્વારા પિતૃઓની પાવન સ્મૃતિમાં ભવ્ય શ્રીમદ્ ભાગવત સપ્તાહનું આયોજન

દેવભૂમિ દ્વારકાના પવિત્ર ધામ એવા શ્રી સ્વામિનારાયણ ભક્તિધામના પ્રાંગણમાં સમસ્ત ગોંડલીયા પરિવાર દ્વારા પિતૃઓની પાવન સ્મૃતિ અને તેમના મોક્ષાર્થે એક ભવ્ય ધાર્મિક મહોત્સવનું આયોજન કરવામાં આવ્યું છે. આ દિવ્ય આયોજન અંતર્ગત શ્રીમદ્ ભાગવત સપ્તાહ પારાયણની સાથે શિખર પર નૂતન ધ્વજારોહણ અને મારૂતિ યજ્ઞનું પણ વિશેષ આયોજન કરાયું છે. પરિવાર દ્વારા પોતાના પિતૃઓ પ્રત્યેની શ્રદ્ધા અને આદરભાવ સાથે યોજાઈ રહેલા આ મહોત્સવને લઈને સ્થાનિક ભક્તજનોમાં પણ ભારે ઉત્સાહ જોવા મળી રહ્યો છે.

આ ભવ્ય કથાનો પ્રારંભ તા. 2-11-2026 ના રોજ સોમવારે આસો વદ આઠમના દિવસે થશે અને તા. 8-11-2026 ના રોજ કથાની પૂર્ણાહુતિ થશે. આ સાત દિવસીય મહોત્સવ દરમિયાન અનેક ધાર્મિક પ્રસંગો ઉજવાશે, જેમાં તા. 2-11-2026 ના રોજ સવારે 8:30 કલાકે ભવ્ય પોથીયાત્રા નીકળશે. આ ઉપરાંત તા. 5-11-2026 ના રોજ ગુરુવારે બપોરે 12 કલાકે રામજન્મ અને સાંજે 6:30 કલાકે કૃષ્ણ જન્મોત્સવની ઉજવણી થશે. તેમજ તા. 6-11-2026 ના રોજ સવારે 10 કલાકે ગૌવર્ધન મહોત્સવ, તા. 7-11-2026 ના રોજ સાંજે 6 કલાકે રૂક્ષ્મણી વિવાહ અને તા. 8-11-2026 ના રોજ સવારે 10:30 કલાકે સુદામા ચરિત્ર તથા બપોરે 12 કલાકે કથા પૂર્ણાહુતિ, ધજાજીનું પૂજન અને યજ્ઞનીૂર્ણાહુતિ થશે.

આ પાવન કથામાં વડતાલ લક્ષ્મીનારાયણ દેવ પીઠાધીપતિ આચાર્યશ્રી રાકેશપ્રસાદજી મહારાજના વિશેષ આશીર્વાદ પ્રાપ્ત થયા છે. કો.સ્વા. ચન્દ્રપ્રસાદદાસજી અને શા.સ્વા. સૂર્યપ્રકાશદાસજીની પ્રેરણાથી આયોજિત આ મહોત્સવમાં શ્રી સ્વામિનારાયણ ભક્તિધામ દ્વારકાના સ્થાપક કો.સ્વા. ચન્દ્રપ્રસાદ દાસજીના કૃપાપાત્ર શિષ્ય બ્ર.શા. સરયુદાસાનંદજી પોતાની મધુર સંગીતસભર શૈલીમાં ભક્તજનોને કથામૃતનું રસપાન કરાવશે. સમસ્ત ગોંડલીયા પરિવાર દ્વારા આ ધાર્મિક મહોત્સવમાં પધારીને કથારૂપી જ્ઞાનગંગાનો લાભ લેવા અને પિતૃઓ માટે પ્રાર્થના કરવા તમામ ધર્મપ્રેમી ભક્તજનોને હાર્દિક નિમંત્રણ પાઠવવામાં આવ્યું છે.