ગીર સોમનાથ જિલ્લાના ઉના તાલુકાના ભીંગરણ ગામે થોડા દિવસો પૂર્વે બનેલી 85 વર્ષીય વૃદ્ધાની હત્યાના કિસ્સાએ સમગ્ર પંથકમાં અરેરાટી મચાવી દીધી છે. સોનાના ઘરેણાં મેળવવાની લાલચમાં સંબંધોને લજવતો આ મામલો સામે આવતા સૌ કોઈ સ્તબ્ધ થઈ ગયા છે. તપાસ દરમિયાન એવું બહાર આવ્યું કે આ નિર્દયી હત્યા બહારના કોઈ શખ્સે નહીં પરંતુ મૃતક વૃદ્ધાની પોતાની સગી ભાણેજ વહુએ જ અંજામ આપી હતી. ગુનો આચર્યા બાદ આરોપી મહિલા કોઈને પણ શંકા ન જાય તે માટે સીધી પરિવારજનોની વચ્ચે પહોંચી ગઈ હતી અને સૌથી મોટેથી રડીને નાટક કરવા લાગી હતી, જેથી કોઈ તેની ઉપર શંકા ન કરી શકે.
ઘટનાની વિગતો મુજબ આરોપી ભાણેજ વહુ અગાઉથી જ પ્લાન બનાવીને ચા પીવાના બહાને વૃદ્ધાના ઘરે પહોંચી હતી. ઘરમાં વૃદ્ધા એકલા હોવાનો પૂરેપૂરો લાભ ઉઠાવીને તેણે પોતાની સાથે લાવેલા તીક્ષ્ણ દાતરડા વડે વૃદ્ધાના ગળા પર ઉપરાછાપરી જીવલેણ ઘા ઝીંકી દીધા હતા. એટલું જ નહીં, વૃદ્ધાએ પહેરેલા સોનાના દાગીના ઝડપથી કાઢી લેવાની લાલચમાં તેણે નિર્દયતાની તમામ હદો પાર કરીને વૃદ્ધાના કાન પણ કાપી નાખ્યા હતા અને તમામ દાગીના લૂંટીને ત્યાંથી ફરાર થઈ ગઈ હતી. જોકે, ઘટનાસ્થળે હાજર નવાબંદર મરીન પોલીસની બાજ નજર આ મહિલાની અસામાન્ય અને શંકાસ્પદ હિલચાલ ઉપર પડી હતી, જેનાથી તેનું તરકટ પકડાઈ ગયું.
નવાબંદર મરીન પોલીસે શંકાના આધારે આ મહિલાની કડકાઈથી પૂછપરછ શરૂ કરી ત્યારે તે પોલીસ સામે ભાંગી પડી અને સોનાના દાગીનાની લાલચે જ હત્યા કર્યાની કબૂલાત કરી લીધી હતી. પોલીસે આરોપી ભાણેજ વહુની વિધિવત ધરપકડ કરીને તેની પાસેથી હત્યામાં વપરાયેલું લોહીવાળું દાતરડું પણ કબજે કરી લીધું છે. હાલ તો પોલીસે લૂંટી લેવાયેલા સોનાના દાગીના ક્યાં છુપાવવામાં આવ્યા છે કે પછી કોઈને વેચવામાં આવ્યા છે કે કેમ તે અંગે આગળની સઘન તપાસ શરૂ કરી દીધી છે.
