મધ્ય પૂર્વમાં ફરીથી યુદ્ધ ફાટી નીકળે તે પહેલાં તેને અટકાવવા માટે સોમવારે સાઉદી અરેબિયા, તુર્કી અને પાકિસ્તાનના વરિષ્ઠ અધિકારીઓએ ઈરાનની રાજધાની તેહરાનમાં મહત્વની બેઠક યોજી હતી. ઓગસ્ટ મહિનામાં મક્કામાં ડિફેન્સ એલાયન્સ બન્યા બાદ આ ત્રણ દેશોની સંયુક્ત મુલાકાત તેહરાનમાં પહેલીવાર થઈ છે. અમેરિકા, ઈરાન અને ઇઝરાયેલ તરફથી 8 મહિનાથી ચાલી રહેલા યુદ્ધમાં શત્રુતા ફરી શરૂ થવાની ચેતવણીઓ વચ્ચે આ હાઇ-પ્રોફાઇલ ચર્ચા યોજાઈ હતી, જેનો હેતુ વર્તમાન કટોકટીમાં તણાવ ઘટાડવાનો હતો.
આ બેઠક દરમિયાન પ્રતિનિધિમંડળોએ ઈરાનના રાષ્ટ્રપતિ મસૂદ પેઝેશ્કિયાન અને ફોરેન મિનિસ્ટર અબ્બાસ અરાઘચી સાથે મુલાકાત કરી હતી. સાઉદી ડિફેન્સ મિનિસ્ટર પ્રિન્સ ખાલીદ બિન સલમાન, પાકિસ્તાનના આર્મી ચીફ જનરલ અસીમ મુનીર અને તુર્કીના ઇન્ટેલિજન્સ ચીફ ઇબ્રાહિમ કાલિન સહિતના દિગ્ગજ નેતાઓએ આ ચર્ચામાં ભાગ લીધો હતો. બેઠક બાદ કોઈ ચોક્કસ મોટી જાહેરાત તો કરવામાં નથી આવી, પરંતુ ઈરાનના સ્ટેટ ટેલિવિઝન અનુસાર ઈરાનના સિક્યુરિટી ચીફ મોહસેન રેઝાઈએ આ ચર્ચાઓને ખૂબ જ સારી ગણાવી હતી અને જણાવ્યું હતું કે આનાથી ક્ષેત્રમાં એક નવું વાતાવરણ ઊભું થઈ રહ્યું છે.
આ બેઠકમાં સહમતિ સધાઈ હતી કે પ્રદેશની સુરક્ષા ત્યાંના દેશોએ જાતે જ હાંસલ કરવી જોઈએ અને કોઈપણ પ્રકારના વિદેશી હસ્તક્ષેપને અટકાવવો અનિવાર્ય છે. આ દરમિયાન ગાઝા, વેસ્ટ બેંક, દક્ષિણ લેબનોન અને દક્ષિણ સીરીયામાં ઇઝરાયેલી કબજા પર પણ ભાર મૂકવામાં આવ્યો હતો. નિષ્ણાતોના મતે તણાવ કાબૂ બહાર જાય તે પહેલાં આ ઐતિહાસિક બેઠક કટોકટીમાંથી બહાર નીકળવાનો છેલ્લો રાજદ્વારી મોરચો સાબિત થઈ શકે છે, જ્યારે યુએન સેક્રેટરી જનરલ એન્ટોનિયો ગુટરેસે પણ મિડલ ઈસ્ટમાં કોઈપણ પ્રકારના તણાવને તાત્કાલિક અટકાવવા પર ભાર મૂક્યો છે.
