કપડવંજ-મોડાસા સ્ટેટ હાઇવે એ આસપાસના વિસ્તારોને જોડતો અત્યંત મહત્ત્વનો અને વ્યસ્ત માર્ગ છે, જ્યાંથી દરરોજ હજારોની સંખ્યામાં નાના-મોટા વાહનો પસાર થાય છે. આવા મહત્ત્વના માર્ગ પર ઇસ્લામપુરા નજીક કોઈ પણ પ્રકારની પરવાનગી વગર કે જવાબદારી વગર રેતી અને કપચીના મોટા ઢગલા ઠાલવી દેવામાં આવ્યા છે. આટલું જ નહીં, કેટલાક અસામાજિક તત્વો દ્વારા આ જાહેર માર્ગ પર જ ખાનગી વાહનોનો અડિંગો જમાવીને આડેધડ પાર્કિંગ કરવામાં આવતું હોવાની ફરિયાદો પણ સામે આવી રહી છે, જેના કારણે રસ્તાની સલામતી સામે ગંભીર સવાલો ઊભા થયા છે.
આ રીતે મુખ્ય રસ્તા પર જ રેતી અને કપચીના ઢગ ખડકાયા હોવાથી અને ખાનગી વાહનો પાર્ક થયેલા હોવાથી પહેલેથી જ ચાલતો આ વ્યસ્ત માર્ગ સાંકડો બની ગયો છે. પરિણામે વાહનચાલકોએ ભારે સાવચેતી સાથે રસ્તો પસાર કરવો પડે છે, અને ખાસ કરીને રાત્રિના સમયે કે સામેથી કોઈ વાહન આવતું હોય ત્યારે ગંભીર અકસ્માત સર્જાવાની શક્યતાઓ અનેકગણી વધી જાય છે. ડ્રાઇવરોની સાથેસાથે પગપાળા ચાલતા રાહદારીઓ માટે પણ રસ્તાની બાજુએ સુરક્ષિત રીતે ચાલવાની કોઈ જ જગ્યા ન બચતા તેમણે જીવના જોખમે સીધા જ વાહનોની અવરજવર વચ્ચે ચાલવાની લાચારી ભોગવવી પડી રહી છે.
આ ગંભીર સમસ્યાને પગલે સ્થાનિક રહીશો અને વાહનચાલકોમાં ભારે હાલાકી જોવા મળી રહી છે અને વહીવટી તંત્રની નિષ્ક્રિયતા સામે રોષ ફેલાયો છે. લોકોની માંગ છે કે સંબંધિત તંત્ર દ્વારા તાત્કાલિક ધોરણે હાઇવે પરથી આ રેતી અને કપચીના ઢગલા હટાવવામાં આવે, આડેધડ પાર્કિંગ બંધ કરાવવામાં આવે અને આ નિયમભંગ કરનાર જવાબદાર લોકો સામે કડક કાર્યવાહી કરવામાં આવે જેથી ભવિષ્યમાં કોઈ મોટી દુર્ઘટના ટળી શકે.
