અસમની સુગંધ હવે સાત સમુંદર પાર દુબઈ સુધી પહોંચવા લાગી છે. રાજ્યના મુખ્યમંત્રી હિમંતા બિસ્વા સરમાએ ગુવાહાટીથી દુબઈ માટે અગરવુડ ચિપ્સની નિકાસ કન્સાઇનમેન્ટને સત્તાવાર રીતે પ્રસ્થાન કરાવ્યું છે. એમજેઆઈ ગ્રુપ દ્વારા આ વિશેષ પહેલ હેઠળ અસમના ગોલાઘાટ જિલ્લામાં પ્રોડ્યુસ થયેલી કુલ 123 કિલોગ્રામ અગરવુડ ચિપ્સ મોકલવામાં આવી છે. અગરવુડ એટલે કે અગરના લાકડાની આ પ્રોડક્ટ વિદેશી બજારોમાં ખૂબ જ ડિમાન્ડ ધરાવે છે અને આ નિકાસથી સ્થાનિક ખેડૂતો તેમજ વેપારીઓને મોટો ફાયદો થશે.
આપને જણાવી દઈએ કે અસમના ખેડૂતો માટે અગરવુડની ખેતી આવકનો મોટો સ્ત્રોત બની રહી છે. આ બાબતને ધ્યાનમાં રાખીને રાજ્ય સરકાર અગરવુડની ખેતીને કાનૂની અને સત્તાવાર માન્યતા અપાવવા માટે એક ખાસ ટાસ્ક ફોર્સની પણ રચના કરી ચૂકી છે. સરકારનો મુખ્ય ઉદ્દેશ્ય એ છે કે અસમના આ અગરવુડ પ્રોડક્ટ્સ સીધા જ વિદેશોમાં એક્સપોર્ટ થઈ શકે, જેથી સ્થાનિક લોકોને આંતરરાષ્ટ્રીય સ્તરે મોટું પ્લેટફોર્મ મળી રહે.
આગામી ભવિષ્યના આયોજન વિશે વાત કરીએ તો, સ્ટેટ ગવર્નમેન્ટ એવા પ્રયાસો કરી રહી છે કે ગુવાહાટીના એરપોર્ટ પરથી જ અગરવુડની ડાયરેક્ટ નિકાસ થઈ શકે તે માટે જરૂરી મંજૂરીઓ અને માન્યતા મળી જાય. જો આ એરપોર્ટને સત્તાવાર મંજૂરી મળી જશે, તો અસમના બિઝનેસમેન માટે દુબઈ સહિતના ગલ્ફ દેશોમાં નિકાસ કરવાનું કામ ખૂબ જ સરળ બની જશે અને આ ઇન્ડસ્ટ્રી ઝડપથી ગ્રોથ કરશે.
