અમદાવાદ શહેરમાંથી એક ચિંતાજનક સમાચાર સામે આવ્યા છે. સોલા વિસ્તારમાં આવેલા AMCના ડ્રેનેજ પમ્પિંગ સ્ટેશનમાં અચાનક શ્રમિકો ઊંડાણમાં ખાબક્યા હોવાની દુર્ઘટના સર્જાતા હડકંપ મચી ગયો છે. કામકાજ ચાલી રહ્યું હતું તે દરમિયાન આ અકસ્માત થતાં પંથકમાં અફરાતફરીનો માહોલ જોવા મળ્યો હતો. ઘટનાની ગંભીરતા જોતા આસપાસના લોકો અને સાથીદારો તાત્કાલિક મદદ માટે દોડી આવ્યા હતા અને રાહતની વાત એ રહી કે અન્ય શ્રમિકોની સમયસૂચકતાથી 2 શ્રમિકોને હેમખેમ બહાર કાઢી લેવામાં આવ્યા છે.
ઘટનાની જાણ થતાં જ ફાયર બ્રિગેડ અને ઇમરજન્સી વિભાગની ટીમો તાત્કાલિક ઘટનાસ્થળે દોડી આવી હતી. ડ્રેનેજ લાઇનનું ઊંડાણ અને અંદર રહેલી હાનિકારક ગેસ કે પરિસ્થિતિને ધ્યાનમાં રાખીને ફાયર જવાનો દ્વારા ખૂબ જ સાવચેતીપૂર્વક કામગીરી કરવામાં આવી રહી છે. ઓક્સિજન કિટ, માસ્ક અને સેફ્ટી દોરડા સહિતના આધુનિક સાધનો સાથે ફાયર વિભાગની ટીમ અંદર ઉતરી છે અને ફસાયેલા અન્ય શ્રમિકોને જલદીથી બહાર કાઢવા માટે યુદ્ધના ધોરણે રેસ્ક્યૂ ઓપરેશન ચાલુ છે.
આ દુર્ઘટના પાછળ સેફ્ટીના સાધનોની કોઈ લાપરવાહી હતી કે કેમ તે તો તપાસ બાદ જ બહાર આવશે, પરંતુ હાલ પ્રાથમિકતા અંદર ફસાયેલા લોકોને સુરક્ષિત બહાર લાવવાની છે. પ્રશાસન અને પોલીસ અધિકારીઓ પણ સ્થળ પર પહોંચી ગયા છે અને બચાવ કામગીરી પર નજર રાખી રહ્યા છે. આ ગંભીર મામલે જેમ-જેમ નવી વિગતો સામે આવશે તેમ અપડેટ્સ મળતા રહેશે.
