તમિલનાડુના રાજકારણમાં અત્યારે ખળભળાટ મચી ગયો છે. DMKના વરિષ્ઠ નેતા અને રાજ્યના પૂર્વ સ્કૂલ એજ્યુકેશન મંત્રી અનબિલ મહેશ પોય્યામોઝીને ચેન્નઈ પોલીસની સેન્ટ્રલ ક્રાઈમ બ્રાન્ચ દ્વારા કસ્ટડીમાં લેવામાં આવ્યા છે. મામલો એટલો ગંભીર છે કે પ્રાઇવેટ શૈક્ષણિક સંસ્થાઓ અને સ્કૂલોને સરકારી મંજૂરીઓ તથા લાયસન્સ આપવાના નામે મોટું કૌભાંડ આચરવામાં આવ્યું હોવાનો ઘટસ્ફોટ થયો છે. તપાસ એજન્સીના સૂત્રોના જણાવ્યા અનુસાર, આ આખા કૌભાંડનું કદ આશરે 100 કરોડ રૂપિયા જેટલું હોવાનું અનુમાન છે અને તપાસ દરમિયાન કુલ 177 સ્કૂલો શંકાના ઘેરામાં આવી છે જેઓ આ કથિત કૌભાંડનો ભોગ બની હોવાનું માનવામાં આવે છે.
આ કેસની કડીઓ જોડતા પોલીસે ડિજિટલ ડિવાઇસમાંથી મળેલા પુરાવાઓ અને પૂછપરછ દરમિયાન નોંધાયેલા નિવેદનોના આધારે પૂર્વ મંત્રી વિરુદ્ધ ભ્રષ્ટાચાર નિવારણ ધારો એટલે કે પ્રિવેન્શન ઓફ કરપ્શન એક્ટ હેઠળ ગુનો નોંધ્યો છે. તપાસમાં પુરાવા મજબૂત મળતા પૂર્વ મંત્રી મુશ્કેલીમાં મુકાયા છે. જોકે, પૂર્વ મંત્રી અનબિલ મહેશે પોતાના પર લાગેલા તમામ આરોપોને નકારી કાઢ્યા છે અને આ કેસ સામે કાનૂની લડત લડવાની તૈયારી દર્શાવી છે. બીજી તરફ, તેમની પાર્ટી DMK એ પણ સત્તાધારી પક્ષ પર આકરા પ્રહાર કરતા આરોપ લગાવ્યો છે કે વિરોધીઓને દબાવવા માટે એજન્સીઓનો દુરુપયોગ કરવામાં આવી રહ્યો છે.
આ ધરપકડ પહેલા સોમવારે મદ્રાસ હાઈકોર્ટે પૂર્વ મંત્રીની આગોતરા જામીન અરજી ફગાવી દીધી હતી. જસ્ટિસ વી લક્ષ્મીનારાયણે ધરપકડ સામે રક્ષણ મેળવવાની તેમની અરજીને નામંજૂર કરી હતી, જેના કારણે પોલીસ માટે કાર્યવાહી કરવાનો રસ્તો સાફ થઈ ગયો હતો. પૂર્વ મંત્રીએ પોતાની સામે નોંધાયેલી એફઆઈઆર રદ કરાવવા માટે પણ અલગથી કોર્ટમાં અરજી દાખલ કરી છે. હાલ તો આ હાઈ-પ્રોફાઈલ ધરપકડને કારણે સાઉથના રાજકારણમાં ગરમાવો આવી ગયો છે અને આગામી દિવસોમાં આ કેસમાં નવા ખુલાસા થવાની પૂરી શક્યતા છે.
