હવે આપણી ગાડીઓ અને વાહનો માટે પેટ્રોલનો ખર્ચ ઘટવાના દિવસો નજીક આવી રહ્યા છે કારણ કે કેન્દ્ર સરકારે ઓટો સેક્ટરમાં મોટો નીતિગત ફેરફાર કર્યો છે. સરકારે મોટર વ્હીકલના નિયમોમાં સત્તાવાર સુધારો કરીને E100 ફ્યુઅલ એટલે કે શુદ્ધ ઈથેનોલથી ચાલતા વાહનો માટેનો માર્ગ મોકળો કરી દીધો છે. અત્યાર સુધી આપણે ગાડીઓમાં પેટ્રોલ અને ડીઝલ જ જોતા હતા, પરંતુ ધીમે ધીમે હવે બજારમાં એવા વાહનો આવશે જે સંપૂર્ણપણે ઈથેનોલ પર દોડશે. સરકારના આ પગલા પાછળનો મુખ્ય હેતુ દેશને ગ્રીન એનર્જી તરફ લઈ જવાનો અને વિદેશથી આયાત થતા ક્રૂડ ઓઈલ પરનો બોજ ઓછો કરવાનો છે.
આ ફેરફારથી આગામી સમયમાં ઓટોમોબાઈલ કંપનીઓ પણ એવા એન્જિન તૈયાર કરવા માટે ઉત્સાહી બનશે જે E100 ફ્યુઅલને સપોર્ટ કરી શકે. ઈથેનોલ એ એક પ્રકારનું આલ્કોહોલ ફ્યુઅલ છે જે મુખ્યત્વે શેરડી અને અન્ય ખેત પેદાશોમાંથી તૈયાર થાય છે. તેના ઉપયોગથી ગાડીઓમાંથી નીકળતો ધુમાડો અને પ્રદૂષણ પણ ખૂબ જ ઓછું થઈ જશે.
સામાન્ય જનતા માટે આ સમાચાર એટલા માટે ખાસ છે કે ભવિષ્યમાં પેટ્રોલના વધતા ભાવો સામે આ એક સસ્તો અને દેશી વિકલ્પ સાબિત થઈ શકે છે. જોકે, આ નવા નિયમો સંપૂર્ણપણે જમીની સ્તરે અમલમાં આવતા અને પેટ્રોલ પંપો પર E100 ઉપલબ્ધ થતા હજુ થોડો સમય લાગશે, પરંતુ સરકારે લીધેલું આ એડવાન્સ સ્ટેપ ઓટો ઈન્ડસ્ટ્રી માટે એક ગેમ-ચેંગર સાબિત થવાની પૂરી સંભાવના છે.
