ઉંમરના કોઈપણ પડાવ પર જો મનમાં લગ્નિ હોય, તો કશું જ અશક્ય નથી. આ વાત મહારાષ્ટ્રના એ વડીલોએ સાચી પાડી છે જેમણે જિંદગીના આ તબક્કે ફરીથી ચોપડા ઉઠાવ્યા છે. રવિવારે મહારાષ્ટ્રમાં એક ખાસ સાક્ષરતા એક્ઝામનું આયોજન કરવામાં આવ્યું હતું, જેણે અનેક વડીલોના ચહેરા પર ખુશીની સાથે આંખોમાં ચમક લાવી દીધી હતી. ભૂતકાળમાં આર્થિક કે પારિવારિક પરિસ્થિતિઓને કારણે જે લોકો શાળાનું મોં પણ નથી જોઈ શક્યા, તેઓ હવે નવી આશા સાથે અક્ષરજ્ઞાન મેળવી રહ્યા છે. આ એક્ઝામમાં આશરે 7 લાખ જેટલા વડીલોએ રજિસ્ટ્રેશન કરાવીને પરીક્ષા આપી હતી, જે એક નવો રેકોર્ડ છે.
આ અદ્ભુત પહેલ પાછળ અનેક દિલને સ્પર્શી જાય તેવી કહાનીઓ જોડાયેલી છે. તેમાં સૌથી ચર્ચાનો વિષય બનેલી એક 65 વર્ષના નાનીની કહાની છે, જેમણે પોતાના જ પૌત્ર પાસે કક્કો ગૂંટતા શીખ્યું અને વાંચતા શીખ્યા. જે પૌત્રને નાની સ્કૂલનું હોમવર્ક કરાવવામાં મદદ કરતી હોય, તે જ પૌત્રે આજે પોતાની નાનીને કલમ પકડાવતા શીખવ્યું. આ એક્ઝામ આપતી વખતે આ નાનીના ચહેરા પર જે આત્મવિશ્વાસ હતો, તે જોવાલાયક હતો. પરિવારના અન્ય સભ્યોએ પણ આ વડીલોની મહેનત અને લગ્નને વધાવી લીધા હતા અને સૌના પરિવારજનોમાં ગર્વની લાગણી જોવા મળી હતી.
આજના આ ડિજિટલ યુગમાં જ્યાં દરેક જણ આગળ વધી રહ્યું છે, ત્યારે વડીલોનું આ રીતે સાક્ષર બનવું એ સમાજ માટે પણ એક મોટી પ્રેરણા છે. સરકાર અને સંબંધિત સંસ્થાઓ દ્વારા ચલાવવામાં આવતી આવી સાક્ષરતા અભિયાન યોજનાઓ રંગ લાવી રહી છે. આટલી મોટી સંખ્યામાં વડીલોનું એક્ઝામ આપવા માટે આગળ આવવું તે સાબિત કરે છે કે શીખવાની કોઈ વયમર્યાદા નથી હોતી. આ વડીલોએ સાબિત કરી દીધું કે જો સાચો ઇરાદો હોય, તો ગમે તે ઉંમરે નવેસરથી શરૂઆત કરી શકાય છે.
