આપણે બધા ભવિષ્યને સુરક્ષિત કરવા માટે કમાણીમાંથી થોડી થોડી રકમ બચાવીને રિટાયરમેન્ટ માટે ફંડ ભેગું કરીએ છીએ. સામાન્ય રીતે લોકો એવું વિચારતા હોય છે કે રિટાયરમેન્ટ પછી દર મહિને 50,000 રૂપિયા મળી જાય તો ઘરનો ખર્ચ આરામથી ચાલી જશે. જો તમારી પાસે પોતાનું ઘર હોય, કોઈ લોન બાકી ન હોય અને સાદી જીવનશૈલી જીવતા હોવ, તો આજે આ રકમ ઘણી લાગે પણ ખરી. પરંતુ, જો તમારું રિટાયરમેન્ટ હજી 20 વર્ષ દૂર છે અને તમે આજનો જ હિસાબ લગાવીને બેઠા છો, તો મોટો ઝાટકો લાગી શકે છે.
આજે જે વસ્તુ 50,000 રૂપિયામાં આવે છે, તે જ ચીજવસ્તુઓ અને લાઈફસ્ટાઇલ જાળવી રાખવા માટે 20 વર્ષ પછી આટલા જ પૈસાથી કામ નહીં ચાલે. આનું સૌથી મોટું કારણ છે મોંઘવારી. જો આપણે વાર્ષિક 6 ટકાના દરે પણ મોંઘવારીનો દર ગણીએ, તો આજે જેનો ખર્ચ 50,000 રૂપિયા છે, તે જ ખર્ચ પૂરો કરવા માટે આજથી 20 વર્ષ પછી દર મહિને આશરે 1,60,000 રૂપિયાની જરૂર પડશે. એટલે કે, સમયની સાથે પૈસાની ખરીદશક્તિ ઘટી જાય છે અને આજે દેખાતી મોટી રકમ ભવિષ્યમાં સાવ નાની લાગવા માંડે છે.
ફાઈનાન્શિયલ એક્સપર્ટ્સના જણાવ્યા મુજબ, મોટાભાગના લોકો રિટાયરમેન્ટ પ્લાનિંગ કરતી વખતે મોંઘવારીની વાસ્તવિક અસરને ઓછી આંકી લે છે. લોકો આજની તારીખના ખર્ચને ધ્યાનમાં રાખીને આખો પ્લાન બનાવી લે છે, જે ભવિષ્યમાં મુશ્કેલીમાં મૂકી શકે છે. રિટાયરમેન્ટ ફંડ બનાવતી વખતે માત્ર એક ફિક્સ આંકડો ધ્યાનમાં રાખવાને બદલે ભવિષ્યમાં શાકભાજી, દૂધ, લાઈટબિલ, દવાઓ અને રોજિંદા વપરાશની ચીજોના ભાવ કેટલા વધી જશે તેનો અગાઉથી જ અંદાજ લગાવવો ખૂબ જરૂરી છે.
જેમ જેમ સમય જાય છે તેમ તેમ રૂપિયાનું વજન ઓછું થતું જાય છે. જો મોંઘવારીનો દર મધ્યમ પણ રહે, તો પણ 2 દાયકામાં તેની બહુ મોટી અસર પડે છે. ધારો કે આજે કોઈ પરિવારનો માસિક ખર્ચ 50,000 રૂપિયા છે, તો મોંઘવારીના જુદા જુદા દરો પ્રમાણે આજથી 20 વર્ષ પછી તે જ પરિવારને પોતાની લાઈફસ્ટાઇલ ટકાવી રાખવા માટે ખૂબ જ મોટી રકમની જરૂર પડશે. તેથી, વહેલી તકે યોગ્ય પ્લાનિંગ કરીને એવું રિટાયરમેન્ટ ફંડ ઊભું કરવું જોઈએ જે ભવિષ્યની મોંઘવારી સામે લડી શકે.
