આજકાલ યુરોપના દેશોમાં માહોલ કંઈક અલગ જ જોવા મળી રહ્યો છે. ફ્રાન્સથી લઈને સ્પેન સુધી ગલીઓ અને રસ્તાઓ પર યુવાઓનો મોટો જમાવડો જોવા મળી રહ્યો છે. ખાસ કરીને ઝેન જી જનરેશન એટલે કે આજના યુવાનો મોંઘવારી, ઘરના વધતા ભાડા, નોકરીઓની અછત અને શાળાઓની ખરાબ હાલત સામે સરકાર સામે મોરચો માંડીને બેસી ગયા છે. ફ્રાન્સ, સ્પેન, ઇટાલી, ગ્રીસ અને પોર્ટુગલ જેવા દેશોની સરકારો પર યુવાનોનું પ્રેશર સતત વધી રહ્યું છે. હવે આ યુવાનો પોતાના ભવિષ્યને લઈને સરકારોને સીધા સવાલો પૂછી રહ્યા છે અને કહી રહ્યા છે કે તેમને સરકાર તરફથી પૂરતો સપોર્ટ જોઈએ છે.
આ આંદોલનની શરૂઆત અલગ-અલગ દેશોમાં અલગ મુદ્દાઓથી થઈ હતી. જેમ કે સ્પેનમાં 87 વર્ષના મેરિકાર્મેન અબાસકાલને તેમના ઘરમાંથી બહાર કાઢવાના વિવાદથી યુવાનો રસ્તા પર ઉતરી આવ્યા. જ્યારે ફ્રાન્સમાં વિદ્યાર્થીઓ અને ટીચર્સ સાથે મળીને સારી સ્કૂલો અને સુવિધાઓની માંગ કરી રહ્યા છે. આ તરફ અલ્બેનિયામાં તો યુએસ પ્રેસિડેન્ટ ડોનાલ્ડ ટ્રમ્પના જમાઈ જારેડ કુશ્નરના સમર્થનવાળા એક લક્ઝરી પ્રોજેક્ટ સામે વિરોધ શરૂ થયો હતો. આજના યુવાનોને એવું સ્પષ્ટ અનુભવાઈ રહ્યું છે કે પોતાના માતા-પિતાના સમય કરતાં આજે ઘર ખરીદવું કે ભાડે રાખવું, સારું એજ્યુકેશન મેળવવું અને સ્ટેબલ નોકરી મેળવવી ખૂબ જ મુશ્કેલ બની ગયું છે.
ફ્રાન્સની સૌથી મોટી સ્ટુડન્ટ યુનિયન યુએનઇએફના વાઇસ પ્રેસિડેન્ટ એલિસ ડી બ્રિટોએ જણાવ્યું કે આ યુવાનોમાં સમાન સમસ્યાઓ વધુ જોવા મળી રહી છે. બધા યુવાનો યુનિવર્સિટીઝ, એજ્યુકેશન અને યુવા વર્ગમાં મોટા ઇન્વેસ્ટમેન્ટની માંગ કરી રહ્યા છે, સાથે જ મોંઘવારી અને હાઉસિંગ પ્રોબ્લેમ પણ મોટો મુદ્દો છે. બદલાતા જોબ માર્કેટ, એઆઈનો વધતો ઉપયોગ અને ક્લાઇમેટ ચેન્જ જેવી બાબતો પણ યુવા પેઢીની ચિંતામાં વધારો કરી રહી છે. યુરોપિયન કોરસ્પોન્ડન્ટના કો-ફાઉન્ડર જુલિયસ ફિન્ટેલમેનના કહેવા પ્રમાણે, આ વિરોધ એ વાત સાબિત કરે છે કે યુવાનો હવે સરકારોથી થાકી ગયા છે અને તેમને લાગી રહ્યું છે કે યુરોપની પોલિટિક્સ આગામી જનરેશન માટે કંઈ ખાસ કરી શકાવામાં નિષ્ફળ રહી છે. ફ્રાન્સમાં તો છેલ્લા 9 વર્ષથી ખરાબ સ્કૂલ ફેસિલિટીઝ અને ટીચર્સની અછત સામે વિદ્યાર્થીઓ વિરોધ કરી રહ્યા છે, અને હવે યુવાનો જવાબની રાહ જોઈને એકદમ થાકી ગયા છે.
