અમેરિકાની રાજનીતિ અને કાયદાકીય કોરિડોરમાં હાલમાં વોશિંગ્ટનનું પ્રખ્યાત કેનેડી સેન્ટર ફરી એકવાર ચર્ચાના કેન્દ્રમાં આવ્યું છે. ડેમોક્રેટિક પાર્ટીના એક સાંસદે ફેડરલ કોર્ટના જજ સમક્ષ એવી અરજી કરી છે કે, ટ્રમ્પ એડમિનિસ્ટ્રેશનના સમયના એવા લગભગ 200 ટેક્સ્ટ મેસેજ બહાર લાવવામાં આવે જે અત્યાર સુધી ગુપ્ત રાખવામાં આવ્યા હતા. આ મેસેજ કેનેડી સેન્ટરની કામગીરી અને તેના ભવિષ્ય સાથે જોડાયેલા છે, જેના કારણે રાજકીય ગરમાવો આવી ગયો છે.
આ સમગ્ર વિવાદની શરૂઆત ત્યારે થઈ જ્યારે પરફોર્મિંગ આર્ટ્સ માટેના આ સેન્ટરને રિનોવેશનના નામે બંધ કરવાનો પ્લાન બનાવવામાં આવ્યો. આ મામલો કોર્ટમાં પહોંચ્યો હતો અને થોડા મહિના પહેલા જ એક જજે મોટો ચુકાદો આપ્યો હતો કે બિલ્ડિંગ પર ડોનાલ્ડ ટ્રમ્પનું નામ ગેરકાયદેસર રીતે જોડવામાં આવ્યું હતું. કોર્ટે આ નામ તરત જ હટાવવાનો આદેશ પણ આપ્યો હતો. આ હુકમ બાદ હવે સાંસદે તે છુપાયેલા મેસેજ બહાર લાવવાની માંગ કરી છે જેથી અંદરખાને શું રંધાઈ રહ્યું હતું તે બહાર આવી શકે.
હવે જોવાનું એ રહે છે કે ફેડરલ કોર્ટ આ મામલે શું વલણ અપનાવે છે અને શું જજ આ 200 જેટલા ટેક્સ્ટ મેસેજને રિલીઝ કરવાનો આદેશ આપે છે કે નહીં. અમેરિકી મીડિયામાં આ કેસને લઈને ભારે ઉત્સુકતા જોવા મળી રહી છે, કારણ કે આ લડાઈ માત્ર એક બિલ્ડિંગના નામ કે રિનોવેશન પૂરતી સીમિત નથી રહી, પરંતુ રાજકીય પાવર ગેમનું સ્વરૂપ લઈ ચૂકી છે. આગામી દિવસોમાં આ મામલે કોર્ટમાં થનારી સુનાવણી પર સૌની નજર ટકેલી છે.
