નવી સવાર ક્યારેક બહુ મોટા દર્દ અને સંઘર્ષ પછી ઊગતી હોય છે. સર્બિયામાં પણ કઈંક આવું જ બન્યું છે. ત્યાંના નોવી સાદ શહેરમાં નવેમ્બર, 2024માં રેલવે સ્ટેશનની છત અચાનક તૂટી પડવાની મોટી દુર્ઘટના ઘટી હતી, જેમાં 16 નિર્દોષ લોકોના જીવ ગયા હતા. આ દુર્ઘટનાએ આખા દેશને હચમચાવી નાખ્યો હતો. લોકોના મનમાં ભ્રષ્ટાચાર અને લાપરવાહી સામે ભારે રોષ ફાટી નીકળ્યો હતો. બસ, આ જ દર્દ અને ગુસ્સો આગળ જતા એક શક્તિશાળી આંદોલનમાં ફેરવાઈ ગયો, જેની આગેવાની યુવા વિદ્યાર્થીઓએ લીધી હતી.
શરૂઆતમાં આ માત્ર ન્યાય માટેનો અવાજ હતો, જે ધીમે ધીમે દેશવ્યાપી ભ્રષ્ટાચાર વિરોધી આંદોલન બની ગયો. સામાન્ય નાગરિકો અને સ્ટુડન્ટ્સે સરકાર પાસે જવાબદારી માંગી અને સિસ્ટમ સુધારવાની જીદ પકડી. આ આંદોલનની તાકાત એટલી બધી વધી ગઈ કે યુવાનોએ માત્ર દેખાવો પૂરતા મર્યાદિત ન રહેતા સીધા ચૂંટણીના મેદાનમાં ઝંપલાવવાનો ઐતિહાસિક નિર્ણય લીધો.
આખરે આ સંઘર્ષનું પરિણામ સામે આવી ગયું છે. તારીખ 25 ઓક્ટોબર, 2026ના રોજ યોજાયેલી સંસદીય ચૂંટણીમાં આ સ્ટુડન્ટ-લે઼ડ મૂવમેન્ટે ભવ્ય વિજય મેળવ્યો છે. આ ચૂંટણી પરિણામોએ દેશના રાજકારણમાં છેલ્લા 12 વર્ષથી અજેય ગણાતા અલેક્ઝાન્ડર વુચિચના શાસનને મોટો ઝાટકો આપ્યો છે. શરૂઆતના અંદાજો અને ટ્રેન્ડ જોઈને વુચિચે પણ પોતાની હાર સ્વીકારી લીધી છે, જોકે સત્તાવાર પરિણામો હજુ આવવાના બાકી છે. આ ઘટના દુનિયાભરના યુવાનો માટે એક ઉદાહરણ બની ગઈ છે કે જો જનતા જાગે અને સાચા મુદ્દાઓ પર અડગ રહે, તો મોટામાં મોટી સત્તા પણ હચમચી જાય છે.
