બોલિવૂડમાં ફરી એકવાર ક્રાઈમ વર્લ્ડનો ખૌફ જોવા મળી રહ્યો છે. એક્ટર ટાઈગર શ્રોફ પર થયેલા હુમલાના કેસમાં પોલીસના હાથે એક પછી એક ચોંકાવનારા ખુલાસા થઈ રહ્યા છે. આ કેસમાં પોલીસે વધુ એક મોટી સફળતા મેળવતા 11મા આરોપીને દબોચી લીધો છે. મધ્ય પ્રદેશના ઇન્દોરથી ઝડપાયેલા આ આરોપીની ઉંમર માત્ર 22 વર્ષ છે અને તે ડિપ્લોમા એન્જિનિયર છે. આશ્ચર્યની વાત તો એ છે કે આ યુવા એન્જિનિયર પ્રાંજલ ઠકરાલ માર્ચ મહિનામાં જ જામીન પર જેલમાંથી બહાર આવ્યો હતો અને બહાર આવતાની સાથે જ તેણે ખતરનાક ગેંગના ઈશારે બોલિવૂડ સ્ટારને નિશાન બનાવવાનું કાવતરું રચ્યું હતું.
પોલીસ તપાસમાં સામે આવ્યું છે કે લૉરેન્સ બિશ્નોઈ ગેંગ સાથે જોડાયેલા અને હાલ અમેરિકાથી પોતાનું નેટવર્ક ચલાવતા અનિલ પંડિતે ટાઈગર શ્રોફ પર હુમલાનો પ્લાન બનાવ્યો હતો. આ પ્લાનને અંજામ આપવાની મુખ્ય જવાબદારી આ 22 વર્ષના એન્જિનિયર પ્રાંજલને સોંપવામાં આવી હતી. પ્રાંજલે જ શૂટરો માટે હથિયારોની ગોઠવણ કરી હતી અને બીજી પિસ્તોલ પણ પૂરી પાડી હતી. આટલું જ નહીં, શૂટરોને લોજિસ્ટિક્સ અને પૈસા પહોંચાડવાનું કામ પણ પ્રાંજલ જ સંભાળતો હતો. પોલીસથી બચવા માટે આ બંને આરોપીઓ કોઈ સામાન્ય કોલ કે મેસેજ કરવાના બદલે સિક્રેટ મેસેજિંગ એપ્લિકેશનનો ઉપયોગ કરતા હતા, જેથી કોઈ પત્તો ન લગાવી શકે.
પ્રાથમિક તપાસમાં એ પણ બહાર આવ્યું છે કે પ્રાંજલ અગાઉ પણ ગંભીર ગુનામાં સંડોવાયેલો હતો. તેણે પંડિતના કહેવાથી જ હરિયાણાના પાનીપતમાં એક બિઝનેસમેન પર હુમલો કર્યો હતો, જેના કારણે તે જેલમાં ગયો હતો અને માર્ચમાં જ જામીન પર છૂટ્યો હતો. જેલની બહાર પગ મૂકતાની સાથે જ તેણે મુંબઈના જુહુ વિસ્તારમાં રહેતા ટાઈગર શ્રોફને ટાર્ગેટ કરવા માટે ફરીથી અનિલ પંડિત સાથે હાથ મિલાવી દીધા હતા. ઘટના દરમિયાન એક હોટેલમાં શૂટરોની બંદૂકમાંથી રાઉન્ડ મિસફાયર પણ થયો હતો, છતાં તેઓ ન પકડાયા. હવે પોલીસે પ્રાંજલના ફોનમાંથી ડેટા રિકવર કરીને તેના ચેટ્સ અને ફાઇનાન્શિયલ ટ્રાન્ઝેક્શનની કુંડળી કાઢવાનું શરૂ કર્યું છે, જેનાથી અનિલ પંડિતના આંતરરાષ્ટ્રીય નેટવર્ક સુધી પહોંચવામાં મોટી મદદ મળશે તેવી આશા છે.
