સુરેન્દ્રનગર પંથકમાંથી એક અત્યંત સંવેદનશીલ અને હ્રદયદ્રાવક કિસ્સો સામે આવ્યો છે, જ્યાં નાની વયની સગીરા સાથે બનેલી ગંભીર ઘટનાએ સૌ કોઈને હચમચાવી દીધા છે. સુરેન્દ્રનગરના એક છેવાડાના વિસ્તારમાં રહેતા સામાન્ય પરિવારની 15 વર્ષની દીકરી સાથે આ દુર્ઘટના ઘટી હતી. ઘરની નજીક આવેલી એક દુકાને અવારનવાર આવતા એક સગીર યુવકે પીડિતા સાથે પરિચય કેળવ્યો હતો અને વાતચીત શરૂ કરી હતી. આ ઓળખાણનો ગેરલાભ ઉઠાવીને આરોપીએ હવસખોર બનીને સગીરાની મજબૂરી કે ભોળાપણનો લાભ લીધો હતો.
આરોપીએ 9 મહિના પહેલા એવો મોકો સાધ્યો જ્યારે સગીરા ઘરે એકલી હતી. તે સગીરાને નજીકની બાવળની ઝાડીઓમાં ખેંચી ગયો અને તેની મરજી વિરુદ્ધ દુષ્કર્મ આચર્યું હતું. આટલું જ નહીં, આ જઘન્ય કૃત્ય તેણે માત્ર એકવાર નહીં પરંતુ બે દિવસ પછી ફરીથી દોહરાવ્યું હતું. આ ઘટના બાદ ડરના માર્યે સગીરાએ શરૂઆતમાં પરિવાર સમક્ષ કઈ કહી શક્યું નહીં, પરંતુ સમય જતાં તેના શરીરમાં આવેલા બદલાવ અને ગર્ભવતી બનવાની હકીકત સામે આવતા પરિવારના પગ નીચેથી જમીન સરકી ગઈ હતી.
પરિવારજનો થોડા દિવસો પહેલા જ સગીરાને લઈને સુરેન્દ્રનગરની મહાત્મા ગાંધી હોસ્પિટલ પહોંચ્યા હતા, જ્યાં તબીબોએ તેની ગંભીર સ્થિતિ અને નાની ઉંમરને ધ્યાનમાં રાખીને તેને તાત્કાલિક રાજકોટની હોસ્પિટલ રીફર કરી હતી. રાજકોટમાં સારવાર દરમિયાન તા. 20-10ના રોજ સગીરાએ એક બાળકીને જન્મ આપ્યો હતો. દીકરીના જન્મ સાથે જ આખો મામલો પોલીસ સુધી પહોંચ્યો હતો.
આ ગંભીર બનાવ અંગે પીડિત સગીરા દ્વારા સુરેન્દ્રનગર બી ડિવિઝન પોલીસ મથકમાં આરોપી સગીર સામે પોક્સો કલમો હેઠળ સત્તાવાર ફરિયાદ નોંધાવવામાં આવી છે. કેસની ગંભીરતાને જોઈને પોલીસે તાત્કાલિક ધોરણે કાયદેસરની કાર્યવાહી હાથ ધરી છે અને હાલ આ મામલાની વધુ તપાસ પોલીસ ઇન્સ્પેક્ટર એચ.એચ.જાડેજા ચલાવી રહ્યા છે, જેથી કાયદાકીય પ્રક્રિયા ઝડપથી આગળ વધી શકે.
