વ્યારામાં શિક્ષણની સાથેસાથે વિદ્યાર્થીઓની પ્રતિભા બહાર લાવવા માટે અવારનવાર વિવિધ પ્રવૃત્તિઓ થતી રહે છે. તાજેતરમાં જ વ્યારાની ર.ફ.દાબુ કેળવણી મંડળ સંચાલિત આર.પી.ચૌહાણ આર્ટ્સ અને જે.કે.શાહ અને કે.ડી.શાહ કોમર્સ કોલેજ ખાતે એક સરસ મજાની વક્તૃત્વ સ્પર્ધા યોજાઈ હતી. કોલેજની સાંસ્કૃતિક સમિતિના ઉપક્રમે યોજાયેલી આ ગુજરાત સાંસ્કૃતિક વક્તૃત્વ સ્પર્ધામાં યુવા હૈયાઓએ ઉત્સાહભેર ભાગ લીધો હતો. આ સમગ્ર આયોજનને સફળ બનાવવા માટે કોલેજના આચાર્ય ડૉ. હિતેન્દ્રસિંહ ખરવાસિયાએ પણ સક્રિય સહયોગ આપ્યો હતો અને સ્ટુડન્ટ્સનો હોંસલો વધાર્યો હતો.
આ સ્પર્ધામાં યુવાનો સમક્ષ દેશ અને સમાજને સ્પર્શતા અત્યંત મહત્વપૂર્ણ અને સળગતા વિષયો મૂકવામાં આવ્યા હતા. સ્પર્ધાના મુખ્ય વિષયોમાં વિકસિત ભારત-2047 અને આત્મનિર્ભર ભારત, સંસ્કૃતિ અને સંસ્કાર એટલે કે રાષ્ટ્રના અસ્તિત્વનો આધાર, ભારતીય નાગરિક તરીકેની ફરજો 51(એ), નશામુક્ત ભારત અભિયાન અને સ્વચ્છ સાયબર ભારત મિશન તેમજ 'કડવા ફળ છે ક્રોધ' જેવા આકર્ષક વિષયોનો સમાવેશ થાય છે. આ તમામ વિષયો પર સ્ટુડન્ટ્સે ખૂબ જ સચોટ અને પ્રભાવશાળી વક્તવ્ય આપીને ઉપસ્થિત સૌ કોઈનું ધ્યાન ખેંચ્યું હતું.
પોતાની વાચાળતા અને રજૂઆતની કલાકારીથી આ સ્પર્ધામાં પાંડે કુશલ રાજકુમારે પ્રથમ ક્રમ મેળવીને બાજી મારી હતી. જ્યારે ત્રિવેદી શિવાની રાજેન્દ્રે બીજો ક્રમ અને શાહ નૈતિક કમલેશભાઇએ ત્રીજો ક્રમ પ્રાપ્ત કર્યો હતો. આ ઉપરાંત પ્રજાપતિ સાગર મુનેશભાઇ તથા ચૌધરી અર્પણા પ્રવીણભાઇએ ચોથો ક્રમ મેળવીને કોલેજનું નામ રોશન કર્યું હતું. સ્પર્ધાના અંતે તમામ વિજેતા અને ઉત્સાહી સ્પર્ધકોને ઉત્સાહવર્ધન માટે પ્રમાણપત્ર આપીને સન્માનિત કરવામાં આવ્યા હતા.
