ટેકનોલોજીની દુનિયામાં આજે ગૂગલ ભલે સર્ચ એન્જિનથી લઈને સ્માર્ટફોન સુધી દરેક ક્ષેત્રે નંબર વન પર હોય, પણ એક સમય એવો પણ હતો જ્યારે ગૂગલના દિગ્ગજોથી એક ખૂબ મોટી ભૂલ થઈ ગઈ હતી. ગૂગલના પૂર્વ CEO એરિક શ્મિટે ખુદ આ વાતનો સ્વીકાર કર્યો છે. એક પોડકાસ્ટમાં વાતચીત દરમિયાન તેમણે જણાવ્યું કે તેમના CEO તરીકેના કાર્યકાળ દરમિયાન સોશિયલ મીડિયા પ્લેટફોર્મની તક ગુમાવી દેવી એ તેમની સૌથી મોટી નિષ્ફળતા હતી. તેમણે સ્પષ્ટપણે કહ્યું કે આ મામલે તેઓ સંપૂર્ણ જવાબદારી સ્વીકારે છે કારણ કે સમયસર નિર્ણય ન લેવાને કારણે તેઓ પાછળ રહી ગયા હતા.
વાત જાણે એમ છે કે એક સમય એવો હતો જ્યારે સોશિયલ મીડિયાની રેસમાં ગૂગલ બાકીના બધા જ ખેલાડીઓ કરતા ઘણું આગળ હતું. પરંતુ, થોડા જ સમયમાં માર્ક ઝુકરબર્ગનું ફેસબુક મેદાન મારી ગયું અને ખૂબ ઝડપથી આગળ નીકળી ગયું. એરિક શ્મિટે સ્વીકાર્યું કે શરૂઆતમાં ગૂગલ પાસે લીડ હતી, છતાં તેઓ આ સોશિયલ ક્રાંતિનો પૂરેપૂરો ફાયદો ન ઉઠાવી શક્યા. આ ખામીને સુધારવા માટે કંપનીએ અગાઉ ઓરકુટ અને બાદમાં ગૂગલ પ્લસ જેવા પ્રોજેક્ટ્સ પણ લોન્ચ કર્યા હતા, પરંતુ તેમાંથી એક પણ પ્લેટફોર્મ ફેસબુક જેવી લોકપ્રિયતા મેળવી શક્યું નહીં અને આખરે નિષ્ફળ સાબિત થયા.
આજના ડિજિટલ યુગમાં સોશિયલ મીડિયા વગર દુનિયાની કલ્પના કરવી પણ મુશ્કેલ છે, ત્યારે ગૂગલ જેવા જાયન્ટ દ્વારા આ ક્ષેત્રે પાછળ રહી જવું એ કોઈ મોટી વાતથી કમ નથી. એરિક શ્મિટે ખુલ્લા મને સ્વીકાર્યું કે ટેકનોલોજીની દુનિયામાં સ્પીડ સૌથી મોટી ચીજ છે અને તેઓ સોશિયલ મીડિયાના ટ્રેન્ડને પકડવામાં ઘણા ધીમા સાબિત થયા. એક સફળ લીડર તરીકે ભૂલ સ્વીકારવાની તેમની આ નિખાલસતાએ ફરી એકવાર ટેક વર્તુળોમાં ચર્ચા જગાવી છે કે કેવી રીતે સમયની સાથે બદલાવું ટેક કંપનીઓ માટે અનિવાર્ય છે.
