અફઘાનિસ્તાનની ક્રિકેટ ટીમે તાજેતરમાં જાહેર થયેલા આંતરરાષ્ટ્રીય ક્રિકેટ પરિષદના એક દિવસીય ક્રિકેટ રૅન્કિંગમાં શાનદાર છલાંગ લગાવીને સાતમું સ્થાન હાંસલ કર્યું છે. શારજાહ ખાતે રમાયેલી ત્રિ-પક્ષીય શ્રેણીની રોમાંચક ફાઈનલ મુકાબલામાં અફઘાનિસ્તાને ઝિમ્બાબ્વેને સાત વિકેટે પરાજય આપીને આ સિદ્ધિ મેળવી છે. આ વિજય સાથે અફઘાનિસ્તાને તેના સર્વોચ્ચ રૅન્કિંગની બરાબરી કરી લીધી છે, જે તેણે અગાઉ પણ હાંસલ કર્યું હતું. આ શાનદાર પ્રદર્શનના બળે અફઘાનિસ્તાને દિગ્ગજ ટીમ ગણાતા ઇંગ્લેંડને પાછળ છોડી દીધું છે, જે હવે ૯૩ રેટિંગ પોઈન્ટ સાથે આઠમા ક્રમે સરકી ગયું છે, જ્યારે અફઘાનિસ્તાન ૯૪ રેટિંગ પોઈન્ટ સાથે સાતમા સ્થાને બિરાજમાન છે.
આ નિર્ણાયક મુકાબલામાં અફઘાનિસ્તાનના બોલરોએ શિસ્તબદ્ધ પ્રદર્શન કરતા ઝિમ્બાબ્વેની સમગ્ર ટીમને માત્ર ૧૬૯ રનમાં ઓલઆઉ કરી દીધી હતી. ઝિમ્બાબ્વે તરફથી સિકંદર રઝાએ ૬૮ રનની લડાયક ઇનિંગ રમી હતી, પરંતુ અફઘાનિસ્તાનના અનુભવી સ્પિનર રાશિદ ખાને ઘાતક બોલિંગ કરતા માત્ર ૪૧ રન આપીને ત્રણ મહત્વની વિકેટ ઝડપી હતી. મોહમ્મદ નબી, ફઝલહક ફારૂકી અને બિલાલ સામીએ પણ બબે બેટ્સમેનોને પેવેલિયન ભેગા કર્યા હતા. શાનદાર બોલિંગ પ્રદર્શન કરનાર રાશિદ ખાનને સમગ્ર શ્રેણીની શ્રેષ્ઠ ખેલાડીનો પુરસ્કાર એનાયત કરવામાં આવ્યો હતો.
ઝિમ્બાબ્વે દ્વારા આપવામાં આવેલા ૧૭૦ રનના લક્ષ્યાંકનો પીછો કરવા ઉતરેલી અફઘાનિસ્તાનની ટીમ માટે ઓપનરો અને મિડલ ઓર્ડરે પરિપક્વતા દાખવી હતી. ઇબ્રાહિમ ઝદ્રાને અત્યંત જવાબદારીપૂર્વક બેટિંગ કરતા ૯૬ બોલમાં અણનમ ૭૦ રન ફટકાર્યા હતા અને ટીમને સરળતાથી વિજય અપાવ્યો હતો. આ ઉપરાંત રહેમત શાહે ૪૩ અને રહેમાનુલ્લા ગુરબાઝે ૩૬ રનનું યોગદાન આપ્યું હતું. શાનદાર બેટિંગ કરનાર ઇબ્રાહિમ ઝદ્રાને મેચના શ્રેષ્ઠ ખેલાડી તરીકે પસંદ કરવામાં આવ્યા હતા. આ જીત સાથે આગામી વિશ્વકપ પહેલા અફઘાનિસ્તાનની ટીમ એક દિવસીય ક્રિકેટમાં એક મજબૂત શક્તિ તરીકે ઉભરી રહી છે, જ્યારે ભારત આ યાદીમાં ટોચના ક્રમે યથાવત છે.
