સરકારી કચેરીઓ અને અન્ય ઉપયોગ માટે મકાનો, જગ્યા કે જમીન ભાડે રાખવાની પ્રથામાં મનસ્વી રીતે ઊંચા ભાડાં નક્કી કરવાની ચાલતી પરંપરા પર કડક અંકુશ મૂકવા માટે રાજ્ય સરકાર દ્વારા એક મહત્વપૂર્ણ પગલું ભરવામાં આવ્યું છે. અઠ્ઠાવીસ વર્ષ લાંબા સમય બાદ ભાડાની નાણાકીય સત્તા સોંપણીના નિયમોમાં ધરખમ ફેરફાર કરીને નાણા વિભાગ દ્વારા નવો અને કડક ઠરાવ પ્રસિદ્ધ કરવામાં આવ્યો છે. આ નવા ઠરાવનો મુખ્ય ઉદ્દેશ્ય સરકારી નાણાંનો બગાડ અટકાવવા અને મિલકતો ભાડે રાખવાની સમગ્ર પ્રક્રિયામાં નાણાકીય શિસ્ત તથા પારદર્શિતા લાવવાનો છે.
સરકાર દ્વારા જાહેર કરાયેલા નવા નિયમો અનુસાર, સરકારી વિભાગો દ્વારા કચેરીઓ, માલસામાનના સંગ્રહ માટેના સ્ટોરરૂમ, ગોદામો, વખારો, ખુલ્લી જગ્યાઓ, નિવાસસ્થાનો, છાત્રાલયો તેમજ ટેકનિકલ અને અન્ય નિવાસી શાળાઓ માટે મકાનો કે જમીન ભાડે લેવામાં આવે ત્યારે અધિકારીઓએ ચોક્કસ મર્યાદામાં જ મંજૂરી આપવાની રહેશે. માર્ગ અને મકાન વિભાગના સક્ષમ ઇજનેર દ્વારા પ્રમાણિત કરાયેલા વ્યાજબી ભાડાને ધ્યાનમાં રાખીને વિવિધ સ્તરના અધિકારીઓની નાણાકીય સત્તાઓનું વિભાજન કરવામાં આવ્યું છે, જેથી મનસ્વી ખર્ચ પર રોક લગાવી શકાય.
આ નવા ઠરાવ મુજબ જિલ્લા કલેક્ટર, ખાતાના વડા અને પ્રાદેશિક વડા માટે પ્રમાણિત ભાડા ઉપરાંત ચાલીસ ટકા અથવા માસિક પચીસ હજાર રૂપિયા પૈકી જે રકમ ઓછી હોય તેટલી જ નાણાકીય સત્તા નક્કી કરવામાં આવી છે. જ્યારે કચેરીના વડા માટે આ મર્યાદા પ્રમાણિત ભાડા ઉપરાંત વીસ ટકા અથવા માસિક બે હજાર રૂપિયા સુધીની રાખવામાં આવી છે. આ ઉપરાંત, વિવિધ સરકારી કચેરીઓમાં પુસ્તકો અને શૈક્ષણિક સામયિકોની ખરીદી તેમજ તેનાં બિલોની ચુકવણી માટે તમામ સ્તરે વાર્ષિક બે હજાર રૂપિયાની નિશ્ચિત મર્યાદા બાંધવામાં આવી છે. સરકારના આ કડક પગલાંથી સરકારી તિજોરી પરનો બિનજરૂરી બોજ ઘટશે અને વહીવટી કામકાજમાં વધુ ઉત્તરદાયित्व તથા જવાબદારી સુનિશ્ચિત થશે.
