બનાસકાંઠા જિલ્લાના કાંકરેજ તાલુકાના મુખ્ય મથક શિહોરી ખાતે વિજયાદશમીના પર્વ નિમિત્તે અદ્ભુત ઉત્સાહ અને ઉમંગ જોવા મળ્યો હતો. દશેરાના આ પવિત્ર અવસરે ફાફ્ડા અને જલેબી સહિતના વિવિધ પરંપરાગત ફરસાણોનું ધૂમ વેચાણ થયું હતું. વહેલી સવારથી જ શહેરની ફરસાણની દુકાનો પર લોકોની લાંબી કતારો અને ભારે ભીડ જોવા મળી હતી, જે તહેવારના માહોલને વધુ જીવંત બનાવતી હતી.
ગુજરાતની સંસ્કૃતિમાં વિજયાદશમીના દિવસે ફાફ્ડા અને જલેબી આરોગવાની પરંપરાનું ખૂબ જ વિશેષ મહત્ત્વ રહેલું છે. વર્ષો જૂની આ પરંપરાને અકબંધ રાખતા શિહોરીના નગરજનોએ પોતાના પરિવારજનો સાથે ઉત્સાહભેર મનપસંદ ફરસાણની ખરીદી કરી હતી. માત્ર ફાફ્ડા અને જલેબી જ નહીં, પરંતુ શિયાળાની વિશેષ વાનગી ગણાતો અડદિયા પાક, દેવડા, ચોળાફળી, બુંદી તેમજ ગાંઠિયા જેવી અનેકવિધ સ્વાદિષ્ટ વાનગીઓની પણ લોકોએ હોંશે હોંશે ખરીદી કરી હતી.
તહેવારના આ પર્વ દરમિયાન આખો દિવસ બજારોમાં ગ્રાહકોની અવરજવર સતત ધમધમતી રહી હતી. પરંપરાગત વાનગીઓનો સ્વાદ માણવાની ઉત્સુકતા અને આનંદે લોકોના તહેવારના ઉત્સાહમાં ચાર ચાંદ લગાવી દીધા હતા. શિહોરીમાં દશેરાના દિવસે જામેલી આ ખાધ્ય સંસ્કૃતિની જમાવટથી સમગ્ર બજારમાં ઉત્સવની રોનક છવાઈ ગઈ હતી અને સ્થાનિક વેપારીઓ તથા ફરસાણના વિક્રેતાઓને ત્યાં સારો એવો આર્થિક ધમધમાટ પણ જોવા મળ્યો હતો.
