વહેલી સવારે અથવા મોડી સાંજે સ્વાસ્થ્ય જાળવવા માટે ચાલવા નીકળતા નાગરિકોની સુરક્ષા હાલના સમયમાં એક મોટો અને ગંભીર પડકાર બની ગયો છે. માર્ગ અકસ્માતના આંકડાઓ સ્પષ્ટ સાક્ષી પૂરે છે કે વાહનોની અનિયંત્રિત ગતિ અને અંધકાર કે ધુમ્મસને કારણે નબળી દ્રશ્યક્ષમતા માર્ગ અકસ્માતો પાછળનું મુખ્ય કારણ છે. ખાસ કરીને પાદચારીઓ માટે રસ્તા પર ચાલવું જોખમી સાબિત થઈ રહ્યું છે. તંત્ર દ્વારા યોગ્ય પગલાં લેવાય તેની રાહ જોયા વગર, નાગરિકોએ પોતાની સુરક્ષાની જવાબદારી જાતે સ્વીકારવી ખૂબ જ જરૂરી બની ગઈ છે.
આ ગંભીર સમસ્યાનો એકમાત્ર સરળ અને સચોટ ઉપાય એ છે કે રસ્તા પર ચાલતી વખતે નાગરિકો અંધારામાં છુપાઈ રહેવાને બદલે અન્ય વાહનચાલકોને સ્પષ્ટપણે 'દેખાઈ' આવે તેવી વ્યવસ્થા કરવી. આ દિશામાં એલઇડી લાઈટનો ઉપયોગ એક ક્રાંતિકારી અને જીવન રક્ષક સાધન સાબિત થઈ શકે છે. જ્યારે વહેલી સવારે અંધારું હોય ત્યારે ચાલવા જનારા લોકો જો પોતાના વસ્ત્રો પર કે હાથમાં નાના એલઇડી પ્રકાશ કે રિફ્લેક્ટિવ બેલ્ટ ધારણ કરે, તો દૂરથી આવતા વાહનચાલકોને તેઓ સરળતાથી દેખાઈ શકે છે અને મોટી દુર્ઘટનાઓ ટાળી શકાય છે.
આપણા શહેરમાં પણ સવારના સમયે મોર્નિંગ વોક માટે મોટી સંખ્યામાં વડીલો, યુવાનો અને મહિલાઓ જાહેર માર્ગો પર નીકળતા હોય છે. સ્ટ્રીટ લાઈટ બંધ હોય કે ઓછા પ્રકાશ વાળા વિસ્તારોમાં અકસ્માતનું જોખમ અનેકગણું વધી જાય છે. આથી, દરેક જાગૃત નાગરિકે સ્વરક્ષણ માટે સાવચેતીના ભાગરૂપે પ્રકાશીત ઉપકરણો અથવા એલઇડી સાધનોનો ઉપયોગ શરૂ કરવો જોઈએ. જનજીવનની સલામતી સર્વોપરી છે, અને નાગરિકોની આ નાની સજાગતા અનેક અમૂલ્ય માનવજીવન બચાવવામાં નિર્ણાયક ભૂમિકા ભજવી શકે છે.
