રાજ્ય સરકારના સુશાસન, સ્વચ્છતા અને પર્યાવરણ જાળવણીના સંકલ્પને સાકાર કરવાના હેતુથી જામનગર જિલ્લામાં 'સેવા સંકલ્પ અભિયાન' અંતર્ગત વિશેષ સ્વચ્છતા ઝુંબેશ અને વૃક્ષારોપણ કાર્યક્રમનું સફળ આયોજન કરવામાં આવ્યું હતું. સહકારી મંડળીઓના જિલ્લા રજિસ્ટ્રારના માર્ગદર્શન હેઠળ યોજાયેલા આ અભિયાનમાં જિલ્લાની તમામ ખેતીવાડી ઉત્પન્ન બજાર સમિતિઓ, નાગરિક સહકારી બેંકો તેમજ વિવિધ સહકારી સંસ્થાઓ ઉત્સાહભેર જોડાઈ હતી. આ સામૂહિક પહેલ થકી સમગ્ર જિલ્લાના સહકારી માળખામાં સ્વચ્છતા અને હરિયાળી પ્રત્યે એક સકારાત્મક લોકજાગૃતિ જોવા મળી હતી.
આ ઝુંબેશ અંતર્ગત સંબંધિત કચેરીઓ અને સંસ્થાઓના પરિસરમાં વ્યાપક સફાઈ કામગીરી હાથ ધરવામાં આવી હતી. કચેરી પરિસર તેમજ તેની આસપાસના વિસ્તારોમાંથી ગંદકી અને કચરાનો યોગ્ય નિકાલ કરવામાં આવ્યો હતો. આ કાર્યક્રમની વિશેષતા એ રહી કે ઉચ્ચ અધિકારીઓ, કર્મચારીઓ તેમજ સહકારી ક્ષેત્રના પ્રતિનિધિઓએ સ્વયં શ્રમદાન આપીને પોતાના કાર્યસ્થળને સુઘડ બનાવ્યું હતું. ઉપસ્થિત સર્વે સ્ટાફે કચેરી પરિસરને સતત સ્વચ્છ, સુંદર અને સુવ્યવસ્થિત રાખવાના દ્રઢ સંકલ્પ લીધા હતા. સ્વચ્છ વાતાવરણથી કાર્યક્ષમતા અને સકારાત્મક ઊર્જામાં વધારો થાય છે તે બાબત પર પણ વિશેષ ભાર મૂકવામાં આવ્યો હતો.
સ્વચ્છતા અભિયાનની સાથોસાથ પર્યાવરણ સંરક્ષણ અને હરિયાળી ક્રાંતિ લાવવાના આશયથી સંસ્થાઓ દ્વારા વ્યાપક વૃક્ષારોપણ પણ કરવામાં આવ્યું હતું. માત્ર રોપા વાવીને સંતોષ માનવાને બદલે તેના યોગ્ય જતન અને ઉછેરની ખાતરી સંબંધિત કચેરીઓ દ્વારા આપવામાં આવી હતી. આ તકે જિલ્લા રજિસ્ટ્રાર દ્વારા પ્રેરક માર્ગદર્શન આપતાં જણાવવામાં આવ્યું હતું કે, સ્વચ્છતા અને પ્રકૃતિનું સંરક્ષણ એ માત્ર ઔપચારિક કાર્યક્રમ નથી, પરંતુ તે આપણી દૈનિક કાર્યશૈલી અને જીવનશૈલીનો અભિન્ન હિસ્સો બનવું જોઈએ. 'સ્વચ્છ કચેરી, સ્વચ્છ પરિસર, હરિયાળું જામનગર'ના સૂત્ર સાથે આ કાર્યક્રમ સમાજ માટે પ્રેરણારૂપ બન્યો હતો.
