જામનગર શહેરના દરિયાકાંઠે આવેલા રોઝી બંદર પર કાર્યરત એક ખાનગી ખાતર પ્લાન્ટમાં ગંભીર અને કમનસીબ દુર્ઘટના સર્જાઈ છે. પ્લાન્ટ પરિસરમાં ખાતરની બોરીઓનું સીલાઈ કામ કરી રહેલા એક નિર્દોષ શ્રમિકનું ઈલેક્ટ્રિક સીલાઈ મશીનમાંથી અચાનક વીજ પ્રવાહ પસાર થતાં કરુણ મોત નીપજ્યું છે. આ અણધારી ઘટનાને પગલે સમગ્ર ઔદ્યોગિક વિસ્તારમાં ભારે ચકચાર મચી જવા પામી છે, જ્યારે રોજીરોટી રળવા ગયેલા શ્રમિકના પરિવાર પર આભ તૂટી પડ્યું છે.
બનાવની પ્રાપ્ત વિગતો અનુસાર, જામનગર શહેરના બેડી થરી વિસ્તારમાં આવેલા ફારૂક-એ-આઝમ ચોકમાં રહેતા ૪૨ વર્ષીય પ્રૌઢ શ્રમિક ઓસમાણભાઈ આદમભાઈ બુચડ રોઝી બંદર સ્થિત જે.એમ. બક્ષીના ખાતર પ્લાન્ટમાં મજૂરી કામ કરતા હતા. તેઓ સવારના સમયે ઈલેક્ટ્રિક સંચાલિત મશીન વડે ખાતરની ગુણોનું સીલાઈ કામ કરી રહ્યા હતા. આ દરમિયાન સીલાઈ મશીન પર લાગેલી ચેઈન અચાનક ઉતરી ગઈ હતી. જેથી ઓસમાણભાઈ આ ચેઈન ફરીથી ચડાવવાનો પ્રયત્ન કરી રહ્યા હતા, તે જ ક્ષણે મશીનમાં જોરદાર વીજ આંચકો લાગ્યો હતો. વીજળીનો આંચકો એટલો તીવ્ર હતો કે તેઓ ક્ષણભરમાં જ ફંગોળાઈને જમીન પર બેભાન અવસ્થામાં ઢળી પડ્યા હતા.
આ દુર્ઘટના સર્જાતા જ આસપાસ કામ કરી રહેલા અન્ય સાથી કર્મચારીઓ તાબડતોબ દોડી આવ્યા હતા અને મશીનનો વીજ પુરવઠો તાત્કાલિક બંધ કર્યો હતો. ગંભીર રીતે ઈજાગ્રસ્ત બનેલા ઓસમાણભાઈને સાથી કામદારો દ્વારા તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યા હતા. જોકે, હોસ્પિટલ પહોંચતા જ ફરજ પરના તબીબોએ તેમને તપાસીને મૃત જાહેર કર્યા હતા. ઘરના મોભી સમાન કમાઉ સભ્યનું અકાળે અવસાન થતાં પરિવારજનોમાં ગમગીની છવાઈ ગઈ છે. આ બનાવ અંગે પોલીસે અકસ્માતે મોતનો ગુનો નોંધી આગળની તપાસ હાથ ધરી છે, તેમજ પ્લાન્ટમાં શ્રમિકો માટે યોગ્ય સુરક્ષા વ્યવસ્થા હતી કે કેમ તે દિશામાં પણ તપાસ શરૂ કરવામાં આવી છે.
