થરાદ શહેરને એક તરફ સ્વચ્છ, સુઘડ અને સુવિધાસભર બનાવવાના દાવાઓ કરવામાં આવી રહ્યા છે, ત્યારે બીજી તરફ સ્થાનિક નગરપાલિકાના નીતિ-નિયમોના સરેઆમ ધજાગરા ઉડાવીને રહેણાંક વિસ્તારોમાં ગેરકાયદેસર રીતે વ્યાપારી બાંધકામો ખડકી દેવાનો ગોરખધંધો પૂરજોશમાં ધમધમી રહ્યો છે. શહેરના મુખ્ય ધોરીમાર્ગ વિસ્તાર તેમજ સોની બજાર સહિતના મોકાના રહેણાંક વિસ્તારોમાં ઊંચા ભાડાં વસૂલવાની લાલચમાં ભૂમાફિયાઓ અને મિલકત ધારકો દ્વારા મોટાપાયે દુકાનો તેમજ વ્યાપારી સંકુલો ઊભા કરી દેવામાં આવ્યા છે. નગરપાલિકા તંત્ર દ્વારા રહેણાંકના હેતુ માટે ફાળવવામાં આવેલી જગ્યાઓ પર વ્યાપારી બાંધકામ કરવા માટેની કોઈ પણ પ્રકારની કાયદેસરની મંજૂરી આપવામાં આવી ન હોવા છતાં, રાજકીય ઓથ અને વગના જોરે સરકારી કાયદાઓનો ખુલ્લેઆમ ભંગ કરવામાં આવી રહ્યો હોવાના ગંભીર આક્ષેપો જાગૃત નાગરિકોમાંથી ઊઠવા પામ્યા છે.
આ ગંભીર પરિસ્થિતિમાં સૌથી વધુ ચિંતાજનક બાબત એ છે કે નિયમોનું ઉલ્લંઘન કરનારા તત્ત્વો મજબૂત રાજકીય પીઠબળ ધરાવતા હોવાથી, સંબંધિત વહીવટી તંત્રના જવાબદાર અધિકારીઓ પણ આવા વગદારો સામે દંડાત્મક કાર્યવાહી કરવામાં ભારે ખચકાટ અનુભવી રહ્યા છે. તંત્રની આ કૂણી નીતિ અને મૂકપ્રેક્ષક બની રહેવાની વૃત્તિને કારણે સામાન્ય જનતામાં ભારે રોષની લાગણી પ્રવર્તી રહી છે. જો રાજકીય વગ ધરાવતા તત્ત્વો આ જ પ્રકારે કાયદાને હાથમાં લઈને આડેધડ બાંધકામો કરતા રહેશે, તો આગામી સમયમાં થરાદ શહેર અત્યંત ગીચ બની જશે અને વાહનવ્યવહારના ચક્કાજામની વિકરાળ સમસ્યાનું મુખ્ય કેન્દ્ર બની જશે તેવા સ્પષ્ટ એંધાણ વર્તાઈ રહ્યા છે. હવે જોવાનું એ રહે છે કે પાલિકા તંત્ર આવા ગેરકાયદેસર વ્યાપારી બાંધકામો પર ધાક બેસાડતી કાર્યવાહી કરશે કે પછી પરિસ્થિતિ પૂર્વવત્ જ રહેશે.
