રિલાયન્સ પરિવારની નાની વહુ રાધિકા અંબાણી પોતાની વિશિષ્ટ શૈલી અને ભારતીય સંસ્કૃતિ પ્રત્યેના લગાવ માટે જાણીતા છે. તાજેતરમાં ભારતીય હસ્તકળા અને પરંપરાને પ્રોત્સાહન આપતી પહેલ ‘સ્વદેશ’ના સફળતાપૂર્વક એક વર્ષ પૂર્ણ થવાની ઉજવણી નિમિત્તે તેમણે પરિધાન કરેલા અનોખા વસ્ત્રોએ સમગ્ર ફેશન જગતનું ધ્યાન આકર્ષિત કર્યું છે. આ વિશેષ અવસરે તેઓ પરંપરાગત કળા અને આધુનિક ફેશનના અદભુત સમન્વય સમાન પરિધાનમાં અત્યંત મનમોહક અને પ્રભાવશાળી લાગી રહ્યા હતા.
રાધિકાના આ પરિધાનની સૌથી ભવ્ય વિશેષતા તેના પર કરવામાં આવેલી અદ્ભુત કલમકારી કારીગરી હતી. તેમના ઘાઘરા પર ભગવાન શ્રીકૃષ્ણની બાળલીલાઓથી લઈને રાસલીલા સુધીના વિવિધ પ્રસંગોને અત્યંત બારીકાઈથી અને જીવંત રીતે કંડારવામાં આવ્યા હતા. આ પૌરાણિક કથા આધારિત સ્કર્ટની સાથે આધુનિક ઢબની કલમકારી વર્કવાળી ચોળી (કોર્સેટ) અને નજાકતભર્યો દુપટ્ટો તેમના સમગ્ર લુકને એક રાજવી તેમજ સાંસ્કૃતિક પરિમાણ બક્ષી રહ્યા હતા.
ભારતીય સંસ્કૃતિ અને પ્રાચીન વારસાને ગૌરવ અપાવતા આ પરિધાને સાબિત કર્યું છે કે પરંપરાગત હસ્તકળા આધુનિક ડિઝાઇનમાં પણ ઉત્કૃષ્ટ સ્થાન મેળવી શકે છે. રાધિકા અંબાણીની આ અનોખી પસંદગી માત્ર સૌંદર્ય પૂરતી સીમિત ન રહેતાં, દેશના પ્રતિભાશાળી કારીગરોની અપ્રતિમ કલા પ્રત્યેનું આદરપૂર્ણ સમર્પણ પણ દર્શાવે છે. સોશિયલ મીડિયા સહિત ફેશન વર્તુળોમાં તેમના આ કલાત્મક અને આધ્યાત્મિક પરિધાનની ભારોભાર પ્રશંસા થઈ રહી છે.
