અમદાવાદ શહેરમાં અસામાજિક તત્વો દ્વારા ગેરકાયદે પ્રવૃત્તિઓ આચરવા માટે આધુનિક ડિજિટલ સુવિધાઓનો દુરુપયોગ કરવાનો એક ચોંકાવનારો કિસ્સો પ્રકાશમાં આવ્યો છે. શહેરના કૃષ્ણનગર પોલીસ મથકની ટીમે બાતમીના આધારે તવાઈ બોલાવીને સામાનની હેરફેર માટે વપરાતી જાણીતી ઓનલાઈન ડિલિવરી એપ્લિકેશન પોર્ટરના માધ્યમથી ચાલતા મોટા દારૂના રેકેટનો પર્દાફાશ કર્યો છે. પોલીસે આ ગુનાહિત ષડયંત્રના મુખ્ય સૂત્રધારો સહિત ત્રણ આરોપીઓની ધરપકડ કરી છે અને તેમની પાસેથી રૂપિયા નવ લાખથી વધુની કિંમતનો વિદેશી દારૂનો જંગી જથ્થો કબજે કર્યો છે.
પોલીસની પ્રાથમિક તપાસમાં બુટલેગરોની અત્યંત ચાલાકીભરી મોડસ ઓપરેન્ડી સામે આવી છે. આરોપીઓ ડિલિવરી એપ્લિકેશન મારફતે વાહન બુક કરાવતા હતા અને તેમાં માલસામાન તરીકે જૂના કપડાંના પાર્સલ દર્શાવતા હતા. રસ્તામાં પોલીસ ચેકિંગથી બચવા માટે તેઓ વાહનમાં આગળ નિશાની કરેલા એક-બે કપડાંના બોક્સ ગોઠવતા, જ્યારે તેની પાછળના તમામ બોક્સમાં વિદેશી દારૂનો જથ્થો છુપાવી દેતા હતા. જો રસ્તામાં પોલીસ વાહન રોકે તો આરોપીઓ માત્ર કપડાંવાળા બોક્સ જ ખોલીને બતાવતા, જેથી પોલીસને શંકા ન જાય અને આ રીતે તેઓ આસાનીથી સમગ્ર શહેરમાં દારૂ સપ્લાય કરતા હતા.
કૃષ્ણનગર પોલીસે આ મામલે નિશિત ઉર્ફે નિશુ શાહ, જય ઉર્ફે દાદુ પવાર તેમજ કિશન શાહ નામના ત્રણ શખ્સોની ધરપકડ કરી છે. ચોંકાવનારી બાબત એ છે કે પકડાયેલા ત્રણેય આરોપીઓ અગાઉ હત્યા જેવા ગંભીર ગુનામાં જેલવાસ ભોગવી ચૂક્યા છે. જેલમાં બંધ હતા તે દરમિયાન તેઓ રાજસ્થાનના ઓમપ્રકાશ બિશ્નોઈ નામના શખ્સના સંપર્કમાં આવ્યા હતા અને બહાર નીકળ્યા બાદ આ ગેરકાયદેસર ધંધો શરૂ કર્યો હતો. પોલીસે હાલ બે હજારથી વધુ દારૂની બોટલો જપ્ત કરી આ આંતરરાજ્ય નેટવર્કના મૂળ સુધી પહોંચવા ઊંડાણપૂર્વક તપાસ હાથ ધરી છે.
