જામનગર જિલ્લાના ધ્રોલ શહેરમાં માનવતા દાખવીને દર્દીની વહારે આવેલી એમ્બ્યુલન્સને રસ્તો આપવો એક કારચાલક માટે મુસીબત સમાન સાબિત થયો છે. ધ્રોલના મુખ્ય માર્ગ પરથી પસાર થઈ રહેલી ૧૦૮ એમ્બ્યુલન્સને આગળ નીકળવા માટે જગ્યા કરી આપવાના આશયથી પોતાની કાર સાઈડમાં ઊભી રાખનાર અબ્બાસભાઈ નામના યુવાન પર બે અસામાજિક શખ્સોએ હુમલો કરી માથામાં પથ્થર મારી ગંભીર ઈજા પહોંચાડી હોવાની ચકચારી ઘટના સામે આવી છે.
બનાવની વિગત અનુસાર, ધ્રોલના ગાંધી ચોક નજીક મુખ્ય માર્ગ પર જ્યારે કારચાલકે એમ્બ્યુલન્સને પ્રાથમિકતા આપી પોતાનું વાહન એક તરફ ઊભું રાખ્યું હતું, ત્યારે જ રોંગ સાઈડમાંથી બેફામ ગતિએ સ્કૂટર લઈને મયલા ભીખા વરુ નામનો શખ્સ ત્યાં આવી પહોંચ્યો હતો. ટ્રાફિકના નિયમોનું ઉલ્લંઘન કરીને આવેલા આ શખ્સે કારચાલક સાથે બોલાચાલી કરીને બેફામ ગાળો ભાંડી હતી. તકરાર વધતાં મયલા વરુએ કારની બારીમાંથી અબ્બાસભાઈનો કાંઠલો પકડી લીધો હતો અને રસ્તા પર પડેલો પથ્થર ઉપાડી સીધો તેમના માથાના ભાગે ઝીંકી દેતાં તેઓ લોહીલુહાણ થઈ ગયા હતા.
આ હિંસક હુમલા દરમિયાન આરોપીનો ભાઈ સીદા ભીખા વરુ પણ ત્યાં ધસી આવ્યો હતો. તેણે પણ ઈજાગ્રસ્ત કારચાલક પર હુમલો કરી તેમનું ગળું પકડી લીધું હતું અને ધમકી આપી હતી કે જો તેના ભાઈ વિરુદ્ધ પોલીસ ફરિયાદ કરવામાં આવશે તો તેનું પરિણામ સારું નહીં આવે. ધોળા દિવસે ભરચક બજારમાં બનેલી આ ગુંડાગીરીની ઘટનાને પગલે આસપાસના લોકોમાં ભારે રોષ અને ભયનો માહોલ ફેલાયો હતો.
આ સમગ્ર મામલે ભોગ બનનાર અબ્બાસભાઈએ ધ્રોલ પોલીસ મથકમાં મયલા ભીખા વરુ અને સીદા ભીખા વરુ સામે કાયદેસરની ફરિયાદ નોંધાવી છે. પોલીસે ગુનો નોંધી આરોપીઓ સામે કડક કાનૂની કાર્યવાહી હાથ ધરી છે. કટોકટીના સમયે દર્દીનો જીવ બચાવવા માટે સહાયરૂપ થનાર નાગરિક પર આવા તત્વો દ્વારા થયેલા હુમલાને પગલે સ્થાનિકોમાં આવા અસામાજિક તત્વો સામે દાખલારૂપ પગલાં ભરવાની માંગ ઉઠી છે.
