વલ્લભવિદ્યાનગર સ્થિત ચારુસેટ યુનિવર્સિટી સંલગ્ન અશોક એન્ડ રીટા પટેલ ઇન્સ્ટિટ્યૂટ ઓફ ફિઝિયોથેરાપી (એઆરઆઇપી) દ્વારા નવી દિલ્હી ખાતે આયોજિત વર્લ્ડ ફિઝિયોથેરાપી એશિયા વેસ્ટર્ન પેસિફિક રિજનલ કોન્ફરન્સમાં અભૂતપૂર્વ પ્રદર્શન કરવામાં આવ્યું છે. દેશની રાજધાની નવી દિલ્હી ખાતે સંપન્ન થયેલી આ બહુપ્રતિષ્ઠિત પરિષદમાં દેશ અને દુનિયાભરના વિષય નિષ્ણાતો, અધ્યાપકો તેમજ સંશોધકો ઉપસ્થિત રહ્યા હતા. આ ભવ્ય સંમેલનમાં એઆરઆઇપી સંસ્થાને ફિઝિયોથેરાપી શિક્ષણ અને સ્વાસ્થ્ય સંશોધન ક્ષેત્રે તેના નોંધપાત્ર યોગદાન બદલ સર્વશ્રેષ્ઠ સંશોધન સંસ્થાનો એવોર્ડ એનાયત કરવામાં આવ્યો છે, જેનાથી સમગ્ર રાજ્યનું ગૌરવ વધ્યું છે.
આ આંતરરાષ્ટ્રીય કોન્ફરન્સ દરમિયાન સંસ્થાના પ્રાધ્યાપકો અને વિદ્યાર્થીઓ દ્વારા શૈક્ષણિક, વૈજ્ઞાનિક, સાંસ્કૃતિક તેમજ અનેકવિધ વિદ્યાર્થીલક્ષી કાર્યક્રમોમાં ખૂબ જ સક્રિયતાપૂર્વક સહભાગિતા નોંધાવવામાં આવી હતી. સંસ્થાના પ્રતિનિધિમંડળે વૈવિધ્યસભર ક્ષેત્રોમાં પોતાની અસાધારણ પ્રતિભાનું પ્રદર્શન કર્યું હતું. વિવિધ સ્પર્ધાઓમાં એઆરઆઇપીના વિદ્યાર્થીઓએ ૬ થી વધુ સાંસ્કૃતિક અને વિદ્યાર્થીલક્ષી પ્રવૃત્તિઓની જુદી જુદી શ્રેણીઓમાં પ્રશંસનીય વિજય મેળવીને મહત્ત્વપૂર્ણ પુરસ્કારો પોતાના નામે કર્યા હતા. આ સિદ્ધિ સંસ્થાના સર્વાંગી વિકાસ અને ઉચ્ચ શૈક્ષણિક મૂલ્યોનું ઉત્તમ ઉદાહરણ પૂરું પાડે છે.
વૈજ્ઞાનિક અને સંશોધન પ્રસ્તુતિના મોરચે પણ સંસ્થાના પ્રતિનિધિઓએ શ્રેષ્ઠ પરિણામ દર્શાવ્યું હતું. પરિષદમાં યોજાયેલી ઉચ્ચ સ્તરીય સ્પર્ધાઓ પૈકી ડૉક્ટર હેતા પટેલે મૌખિક વૈજ્ઞાનિક સંશોધન પ્રસ્તુતિમાં સમગ્ર સભા સમક્ષ ઉત્કૃષ્ટ દેખાવ કરીને દ્વિતીય સ્થાન હાંસલ કર્યું હતું. આ ઉપરાંત, સંસ્થાની પ્રતિભાશાળી વિદ્યાર્થીની ખુશી ભાનુશાળીએ વિદ્યાર્થી સંશોધન પત્ર પ્રસ્તુતિ સ્પર્ધામાં પ્રથમ પુરસ્કાર પ્રાપ્ત કરીને સંસ્થાનું નામ રોશન કર્યું હતું. રાષ્ટ્રીય મંચ પર મેળવેલી આ બહુવિધ સફળતાઓ બદલ ચારુસેટ પરિવાર, પદાધિકારીઓ અને વિદ્યાજગતના અગ્રણીઓએ તમામ વિજેતાઓને હાર્દિક અભિનંદન પાઠવ્યા હતા.
