સાબરકાંઠા જિલ્લાના પ્રાંતિજ નજીક આવેલા ત્રણ રસ્તા ઓવરબ્રિજ પર ગુરૂવારે વહેલી પરોઢે એક ગંભીર અને ચોંકાવનારો અકસ્માત સર્જાયો હતો. ગેરકાયદેસર રીતે વિદેશી દારૂનો મોટો જથ્થો ભરીને પૂરપાટ ઝડપે દોડતી એક કારે આગળ જઈ રહેલા અન્ય વાહનને જોરદાર ટક્કર મારી દીધી હતી. આ અકસ્માત એટલો જોરદાર હતો કે ટક્કર લાગતાની સાથે જ વાહનમાં છુપાવેલા દારૂની હેરાફેરીનો પર્દાફાશ થઈ ગયો હતો. જોકે, અકસ્માત સર્જાયા બાદ પકડાઈ જવાની બીકે દારૂ ભરેલી ગાડીનો ચાલક વાહન સ્થળ પર જ રેઢું મૂકીને અંધારાનો લાભ લઈ રફુચક્કર થઈ ગયો હતો.
પ્રાપ્ત વિગતો અનુસાર, કોઈપણ પાસ કે પરમિટ વિના વિદેશી દારૂની ખેપ મારી રહેલા કારચાલકે ગફલતભરી અને બેફામ રીતે વાહન હંકારીને આગળ જતી અન્ય એક કારને પાછળથી ધડાકાભેર ટક્કર મારી દીધી હતી. અકસ્માતનો મોટો અવાજ થતાં જ આસપાસના લોકો તાત્કાલિક સ્થળ પર દોડી આવ્યા હતા. સ્થાનિક લોકો જ્યારે મદદ માટે પહોંચ્યા ત્યારે કારની અંદર બનાવેલા ગુપ્ત ખાનાઓ તૂટી ગયા હોવાનું સામે આવ્યું હતું અને તેમાં સંતાડેલી દારૂની બોટલોનો કચ્ચરઘાણ વળી ગયો હતો. આ ઉપરાંત કારની પાછળની સીટ પરથી પણ વિદેશી દારૂનો જથ્થો ખુલ્લો પડી જતાં લોકો સ્તબ્ધ થઈ ગયા હતા. સદનસીબે, આગળ જતી નિર્દોષ કારના ચાલકનો ચમત્કારિક બચાવ થયો હતો અને મોટી જાનહાનિ ટળી હતી.
ઓવરબ્રિજ પર આ અકસ્માતને પગલે બંને વાહનો રસ્તા વચ્ચે ફસાઈ જતાં વાહનવ્યવહાર ખોરવાઈ ગયો હતો અને લાંબો ટ્રાફિક જામ સર્જાયો હતો. આ ઘટનાની જાણ થતાં જ પ્રાંતિજ પોલીસનો કાફલો તાત્કાલિક ઘટનાસ્થળે પહોંચી ગયો હતો. પોલીસે ક્રેનની મદદથી બંને અકસ્માતગ્રસ્ત વાહનોને માર્ગની બાજુમાં ખસેડીને ટ્રાફિક હળવો કરી વાહનવ્યવહાર પૂર્વવત કરાવ્યો હતો. ત્યારબાદ પોલીસે વિદેશી દારૂનો જથ્થો તેમજ કાર પોતાના કબજે લીધા હતા. પ્રાંતિજ પોલીસે ફરાર થઈ ગયેલા કારચાલક વિરુદ્ધ પ્રોહિબિશન સહિતનો ગુનો નોંધીને તેને ઝડપી પાડવા માટે આગળની કાયદેસરની તપાસ તેજ કરી છે.
