આંધ્રપ્રદેશના શ્રીકાકુલમ જિલ્લામાં રેલવે ટ્રેક નજીકથી આસામની ૨૦ વર્ષીય યુવતીનો શંકાસ્પદ હાલતમાં મૃતદેહ મળી આવતાં ભારે ચકચાર મચી ગઈ છે. મૃતક યુવતીની ઓળખ ગુવાહાટીની બી. બોરુઆ કોલેજમાં અભ્યાસ કરતી અને આસામના કામરૂપ જિલ્લાની રહેવાસી હિમાશ્રી બોરો તરીકે થઈ છે. તે એક નૃત્ય જૂથ સાથે સાંસ્કૃતિક કાર્યક્રમ માટે વિશાખાપટ્ટનમ ગઈ હતી અને ત્યાંથી પરત ફરતી વખતે ટ્રેનમાંથી રહસ્યમય રીતે ગુમ થઈ ગઈ હતી. આ ઘટનામાં સૌથી ચોંકાવનારી બાબત એ સામે આવી છે કે મોતના થોડા સમય પહેલાં તેણે પોતાના પરિવારને મોકલેલા છેલ્લા સંદેશામાં પોતાની આસપાસ ઘણા અજાણ્યા પુરુષો હોવાનો અને પોતાને ભારે ડર લાગતો હોવાનો ઉલ્લેખ કર્યો હતો.
પોલીસ તપાસ અને પરિવાર દ્વારા નોંધાવવામાં આવેલી ફરિયાદ અનુસાર, હિમાશ્રી આગામી ૧૦ ઓક્ટોબરે ગુવાહાટીમાં યોજાનારી બેંકની પરીક્ષા આપવા માટે ઉતાવળે ઘરે પરત ફરી રહી હતી. તેણે શરૂઆતમાં તાત્કાલિક ટિકિટ મેળવવાનો પ્રયાસ કર્યો હતો, પરંતુ રિઝર્વેશન કન્ફર્મ ન થતાં તે ૫ ઓક્ટોબરની રાત્રે વિશાખાપટ્ટનમ રેલવે સ્ટેશનથી ડિબ્રુગઢ વિવેક એક્સપ્રેસ ટ્રેનમાં સવાર થઈ હતી. આ ટ્રેન ૭ ઓક્ટોબરના રોજ સવારે ગુવાહાટી પહોંચવાની હતી. મુસાફરી શરૂ થયા બાદ તે સતત પોતાના પરિવારજનો અને મિત્રો સાથે ફોન પર સંપર્કમાં રહી હતી.
મુસાફરી દરમિયાન હિમાશ્રીએ તેના મિત્રો અને પરિવારને જણાવ્યું હતું કે કોચમાં ભારે ભીડ છે અને તે મુખ્યત્વે પુરુષ મુસાફરોથી ઘેરાયેલી હોવાથી અસુરક્ષિતતા અનુભવી રહી છે. તેણે મોકલેલા છેલ્લા કરુણ સંદેશા બાદ તેનો ફોન અચાનક સંપર્ક વિહોણો થઈ ગયો હતો અને ત્યારબાદ સ્વિચ ઓફ થઈ ગયો હતો. ત્યારપછી આંધ્રપ્રદેશના શ્રીકાકુલમ નજીક રેલવે પાટા પાસેથી તેનો મૃતદેહ મળી આવ્યો હતો. હાલમાં પોલીસે આ મામલે ગુનો નોંધીને તપાસના ચક્રો ગતિમાન કર્યા છે. પોસ્ટમોર્ટમ અને ફોરેન્સિક તપાસના અહેવાલ આવ્યા બાદ જ યુવતીના મોતનું ચોક્કસ કારણ જાણી શકાશે.
