વ્યારા સુગર મિલ દ્વારા શેરડી પકવતા ખેડૂતોને લાંબા સમયથી બાકી નીકળતા નાણાં ચૂકવવામાં ન આવતા ધરતીપુત્રોમાં ભારે રોષ ભભૂકી ઊઠ્યો છે. અગાઉ સત્તાધીશો અને વહીવટી તંત્ર સમક્ષ વારંવાર રજૂઆતો કરવા છતાં આ ગંભીર સમસ્યાનું કોઈ યોગ્ય નિરાકરણ ન આવતા આખરે ખેડૂત સભાસદો અને અગ્રણીઓએ આંદોલનનું શસ્ત્ર ઉગામ્યું છે. વિરોધ પ્રદર્શનના ભાગરૂપે સેવા સદનના મુખ્ય દ્વાર બહાર મોટી સંખ્યામાં એકઠા થયેલા ખેડૂતોએ સહકારી અગ્રણી તેમજ વ્યારા સુગરના ચેરમેન માનસિંગ પટેલના પૂતળાનું દહન કરીને સૂત્રોચ્ચાર સાથે ઉગ્ર આક્રોશ વ્યક્ત કર્યો હતો.
ખેડૂતોના આ આંદોલનને પગલે સમગ્ર પંથકના રાજકીય અને સહકારી ક્ષેત્રમાં પણ ગરમાવો આવી ગયો છે. ખેડૂતોની આ ન્યાયિક લડતમાં પ્રદેશ ભાજપ અનુસૂચિત જનજાતિ મોરચાના ઉપાધ્યક્ષ ધવલ ચૌધરી તથા જિલ્લા પંચાયતના માજી ઉપપ્રમુખ સહિતના શાસક પક્ષના આગેવાનો પણ સમર્થનમાં જોડાઈ જતાં મામલો વધુ ગંભીર બન્યો છે. આંદોલનકારીઓએ આક્ષેપ કર્યો હતો કે મહેનતકશ ખેડૂતોએ રાત-દિવસ એક કરીને પકવેલી શેરડી મિલમાં જમા કરાવી દીધી હોવા છતાં તેમના હકના નાણાં મહિનાઓથી અટવાઈ પડ્યા છે, જેના કારણે ખેડૂતો માટે પરિવારનું ગુજરાન ચલાવવું મુશ્કેલ બન્યું છે.
ખેડૂતો અને સભાસદોએ વહીવટી તંત્રને સ્પષ્ટ શબ્દોમાં ચેતવણી આપી છે કે જો તેમના બાકી લેણાં તાત્કાલિક અસરથી ચૂકવવામાં નહીં આવે, તો આગામી દિવસોમાં આ લડત વધુ આક્રમક સ્વરૂપ ધારણ કરશે. જેમાં સમગ્ર વિસ્તારમાં રેલ રોકો આંદોલન છેડવાની સાથે સુગર મિલના તમામ ડિરેક્ટરોના નિવાસસ્થાને અચોક્કસ મુદતના ધરણાં યોજવાની કડક ચીમકી ઉચ્ચારવામાં આવી છે. ખેડૂતોના આ આક્રમક વલણને જોતાં સ્થાનિક તંત્રમાં દોડધામ મચી ગઈ છે.
