મહારાષ્ટ્રની રાજનીતિમાં હાલ એક વિવાદાસ્પદ ઓડિયો ક્લિપને લઈને ભૂકંપ સર્જાયો છે, જેમાં મરાઠા અનામત આંદોલનના અગ્રણી મનોજ જંગે પાટીલને કાબૂમાં રાખવા માટે પાંચ સો કરોડ રૂપિયાની લેવડદેવડ થઈ હોવાનો ગંભીર દાવો કરવામાં આવ્યો છે. આ સમગ્ર મામલાની ગંભીરતાને ધ્યાનમાં રાખીને રાજ્યના મુખ્યમંત્રી દેવેન્દ્ર ફડણવીસે તાત્કાલિક ધોરણે એક ઉચ્ચ સ્તરીય ફોરેન્સિક તપાસના આદેશ આપ્યા છે. આ ઓડિયો ક્લિપ સામે આવ્યા બાદ શાસક ગઠબંધનમાં જ ભારે ખળભળાટ મચી ગયો છે અને સાથી પક્ષો ભાજપ તથા શિવસેના વચ્ચે ખુલ્લો ઘર્ષણ શરુ થઈ ગયો છે.
શિવસેનાના વરિષ્ઠ નેતા રામદાસ કદમે આ મામલે આક્રમક વલણ અપનાવતા ભારતીય જનતા પાર્ટીની વિશ્વસનીયતા સામે મોટા સવાલો ઉભા કર્યા છે. તેમનું કહેવું છે કે વાયરલ થયેલી ઓડિયો ક્લિપમાં ભારતીય જનતા પાર્ટીના કેટલાક દિગ્ગજ નેતાઓના અવાજો અને નામો સંભળાઈ રહ્યા છે, જેથી સાથી પક્ષે આનો ખુલાસો કરવો જ પડશે. શિવસેનાએ આક્ષેપ કર્યો છે કે શિવસેનાના સર્વોચ્ચ નેતાની વધી રહેલી લોકપ્રિયતા અને પ્રભાવથી ડરીને ભાજપના જ કેટલાક નેતાઓ તેમની છબી ખરાબ કરવા માટે ષડયંત્ર રચી રહ્યા છે અને પીઠમાં છરો ભોંકવાનું કામ કરી રહ્યા છે.
બીજી બાજુ, ભારતીય જનતા પાર્ટીએ શિવસેનાના આ આક્ષેપોને સખત શબ્દોમાં નકારી કાઢ્યા છે અને સાથી પક્ષને ચેતવણી આપી છે કે આ પ્રકારના સંવેદનશીલ મુદ્દાઓને જાહેરમાં ઉછાળવાથી શાસક ગઠબંધનની એકતા અને સ્થિરતાને મોટું નુકસાન થઈ શકે છે. ભાજપના નેતાઓએ વળતો પ્રહાર કરતા કહ્યું છે કે સરકારી ગઠબંધનમાં રહીને પોતાના જ સાથી પક્ષ પર જાહેરમાં કાદવ ઉછાળવો યોગ્ય નથી. મુખ્યમંત્રી દેવેન્દ્ર ફડણવીસે સ્પષ્ટતા કરી છે કે આ ઓડિયો ક્લિપ અચાનક અઢી વર્ષ પછી કેમ બહાર આવી અને તેની પાછળ કોનો હાથ છે, તે ફોરેન્સિક તપાસ બાદ જ સાચું બહાર આવશે.
